AGENDA CULTURAL

O Arqueolóxico lembra ao seu mentor

"Hai moito de Macías dentro do museo", razoa o seu director, Xulio Rodríguez, coma presentación da mostra que homenaxea ao intelectual no seu 175 aniversario

Dous operarios colocan un retrato de Marcelo Macías na sala de Afundación.
Dous operarios colocan un retrato de Marcelo Macías na sala de Afundación.
O Arqueolóxico lembra ao seu mentor

Marcelo Macías (1843-1941) naceu en Astorga, pero pasou boa parte da súa vida en Ourense, onde contribuiu en gran medida a enriquecer a vida cultural da cidade. Agora, 175 anos despois do seu nacemento, o Museo Arqueolóxico da cidade, a través da Consellería de Cultura, organiza a exposición "Marcelo Macías. 175 anos aniversario", que se inaugura hoxe ás 18,30 horas na sala de exposicións de Afundación e que contará coa presenza de Román Rodríguez, conselleiro de Cultura e Turismo, ou do alcalde de Ourense, Jesús Vázquez.

Ademais da súa importante aportación ao imaxinario cultural de Ourense, o catedrático en filosofía e letras tamén destacou polos seus estudos en numismática ou arqueoloxía. "Nesta exposición hai elementos importantes da súa vida , como o flageolet que tocaba ou pezas arqueolóxicas que el estudou e que o museo posúe grazas a el", explica Xulio Rodríguez, director do Arqueolóxico que, aínda que está pechado, "hai moito del aí dentro". Macías, un dos mentores e responsables da creación do Museo Arqueolóxico -ao comezo adicado á pintura-, volve estar no foco da axenda cultural da cidade: "É unha oportunidade para coñecer a labor grazas á que agora existe parte do noso patrimonio cultural e para recordar que pertencemos a un fragmento da historia que non comeza con nós". Rodríguez anima aos ourensáns a visitar esta exposición para coñecer "a unha figura senlleira da nosa cultura".

 Lugar: sala de exposicións Afundación
Hora: 18,30 horas