Un total de doce usuarios son os que ten na actualidade a vivenda comunitaria de Xunqueira de Ambía. Un espazo que ocupa as antigas instalacións da Garda Civil, adquiridas polo ente local e que foron rehabilitadas pola Deputación de Ourense para ofrecer este servizo social aos veciños maiores. Ademais, esta adecuación permitiu xerar seis postos de traballo.
O presidente da Deputación, Manuel Baltar, visitou as instalacións xunto ao alcalde, José Luis Gavilanes, e reiterou a “firme aposta da Deputación para a colaboración cos gobernos locais” e o xeito no que se impulsou esta vivenda comunitaria “activando a economía local e ofrecendo un servizo máis á veciñanza”.
Na súa visita a Xunqueira, o representante provincial achegouse ata o colexio público “Padre Crespo” de Xunqueira de Ambía. Alí destacou o “positivo feito diferenciador” que supón o feito de contar cunha matrícula de 115 escolares nun concello que ten un censo de 1.600 habitantes. Neste senso, puxo en valor as “numerosas” actividades extraescolares que organiza e comprometeuse tamén a estudar a petición de construír un rocódromo pensado para os rapaces.
Por outra banda, dende o Concello de Xunqueira tamén se solicitou maquinaria para acondicionar unha finca anexa ao recinto escolar, cedida por unha veciña, que permitirá ampliar a zona de xogos dos nenos, e fíxose outra petición de colaboración para a mellora dun parque infantil.
Manuel Baltar e José Luis Gavilanes repasaron, con motivo do encontro, outras actuacións nas que coopera o organismo provincial, entre elas, a mellora do trazado da estrada entre Xunqueira e San Cibrao, ou a construción do cemiterio de Abeleda, que en dúas fases posibilitará facer preto de 200 sepulturas. Tamén se abordou o empedrado de 200 metros entre as prazas do Campo e do Concello.
