Xosé Benito Reza: "Vivimos nun gran territorio con moito patrimonio que amosar"

A riqueza natural e cultural da Baixa Limia e Terra de Celanova, territorios irmáns unidos polas calzadas romanas, a OU-540 ou o xeodestino turístico, contan con un novo espazo de promoción. Trátase de A Xanela, unha publicación que viu a luz este mes baixo a dirección do escritor Xosé Benito Reza. Que é A Xanela? É unha ventá para asomarse, non de fóra para dentro, senón para os que veñan a visitarnos, que vexan as cousas tan bonitas e fermosas do noso patrimonio natural e cultural. Como xurdiu o proxecto? Foi cousa de Lino de Prado (empresario). A vida ten estas casualidades e oportunidades sorprendentes. Eu non o coñecía, pero propúxome facerlle unha revista para a xente que se hospede no hotel que acaba de abrir en Celanova. É de agradecer o seu comportamento xeneroso coa súa terra de nacemento e un exemplo para moita xente. Despois implicamos aos concellos, 13 dos 16 que integran as dúas comarcas, máis Calvos de Randín. Así que estou encantado, porque sen a súa axuda e compromiso, A Xanela non existe. Cal é o obxectivo? Propuxémonos facer algo potente, ambicioso, que abarque patrimonio natural e cultural do territorio porque ten moito que amosar. Son as dúas comarcas porque eu teño o corazón partido. Eu son de Celanova e sempre estiven metido nos “saraos” culturais, pero a Baixa Limia é a miña terra de adopción. Os meus grandes proxectos na administración foron alí: o parque e a reserva do Xurés, o campamento romano, o camiño natural de San Rosendo, o aprecio tan grande que me ten a xente da comarca… E despois porque hai unhas vías romanas que nos unen dende fai 2.000 anos, nos coseron ás xentes das dúas comarcas. Nós temos poucos contactos con Allariz, tampouco moitos coa Limia Alta, pero si coa Baixa Limia. Que se pode atopar o lector? A liña editorial é contar con tres ou catro artigos potentes, con colaboradores externos que falen do patrimonio cultural e natural. Entrevistas á xente da zona, un apartado de miscelána e outra adicada as infraestruturas turísticas dos concellos: rutas, miradoiros, festas, feiras… para amosar todo o que temos á xente de fóra. Apelamos a xenerosidade e a voluntariedade da xente, por iso estou agradecido os expertos que colaboraron neste número e tamén a ese equipiño de xente nova que axudou que a revista saíra adiante. Haberá máis números? Será unha revista semestral e iremos alternando as publicación sobre o patrimonio natural e o cultural, e tamén darase esta alternancia entre as comarcas. No número de verán irá un artigo do experto Xosé Benito Reza sobre o Parque do Xurés (risas), tamén terán un protagonismo especial “Xocas”, a cabra montesa, “Aires da miña terra” de Curros... Ten cabida o papel na era dixital? Adianto que igual facemos o esforzo de colgala na web, pero si. Só pola calidade da publicación, é unha gozada. Para a xente que lle gusta ler, os namorados dos libros, da fotografía, penso que é un luxo contemplala. Fai seis meses que se xubilou e xa dirixe unha revista, que outros proxectos ten en mente? Estou cunha guía para un concello da provincia. Estou encantado de poder escribir do que sei, de patrimonio natural, da paisaxe. E teño algo pendente (libro), a ver si atopo a alguén que se decida a publicalo.