|
A intención este ano foi a de confeccionar un cartel "moi variado", o "máis ecléctico" de todas as edicións deste festival, que abarque distintos tipos de música e "cubra a demanda da maioría do público", dixo durante a presentación Iván Méndez, de Bring The Noise. Esta cita, que "se converteu en só dúas edicións nun dos grandes festivais do sur de Europa", agrupará este ano "algúns dos grandes nomes do rock, da música urbana e da música electrónica", así como unha "gran presenza galega". CARTEL Con iso, durante ese tres días pasarán polo Monte do Gozo de Santiago grupos como The National, Editors ou Foals, na súa primeira visita a Galicia, así como Liam Gallagher, DJ Snake ou The Chemical Brothers e o cantante Jason Derulo, que dará en Compostela o seu único concerto do ano en España.
A "música urbana" estará representada por nomes como Bad Bunny ou Daddy Yankee neste festival, no que actuarán tamén Armin Van Buuren, Timmy Trumpet, Editors ou Natos y Waor. No cartel estarán amplamente representados os grupos e artistas galegos, con nomes como Xoel López, Guadi Galego, Furious Monkey House, Triángulo de Amor Bizarro, Presumido, Budiño, Escuchando Elefantes, Cora Velasco, The Killer Barbies, Sen Senra ou Boyanka Kostova, e nacionais, como Carolina Durante, Kase.O, Miss Cafeína, Tigre y Diamante, Les Castizos ou Lola Índigo. Con iso, acudirán até o Monte do Gozo artistas que foron cabezas de cartel en festivais internacionais como Coachella ou LollaPalooza e que suman até 12 premios Grammy. O 88% chega a esta cita presentando os seus novos traballos, o que converte a O Son do Camiño nun evento "ligado ao panorama musical máis actual", como destacan os seus organizadores. Os abonos para asistir a este evento, a un prezo de 59 euros, poranse á venda o vindeiro martes, día 10, ás 14,00 horas. Polo momento, haberá que esperar para coñecer a distribución artistas por días. MÁIS AFORAMENTO Tras o éxito cultivado nas súas dúas edicións anteriores, nas que os abonos se esgotaron en poucas horas, O Son do Camiño chegará este ano a un "Monte do Gozo ampliado", explicou o conselleiro de Cultura, Román Rodríguez. Fronte aos 97.000 asistentes de 2019, este ano o festival amplía aforamento e márcase a posibilidade de alcanzar os 120.000 participantes, á vez que incorpora un novo escenario, até tres, e unha área de restauración e cámping con capacidade para 4.000 persoas. Ademais, por primeira vez, estará dispoñible o renovado recinto de aloxamento xestionado por Carrís Hoteis. O ano pasado, o festival xerou un retorno económico próximo aos 15 millóns de euros e xerou máis de 900 postos de traballo directos e indirectos, lembrou a Xunta, así como un 100 por cen de ocupación hostaleira. O 59% dos asistentes procedían de fóra de Galicia. Durante a presentación do cartel, na que estiveron representantes de Bring The Noise, Esmerarte Industrias Creativas e Estrella Galicia, Román Rodríguez defendeu que O Son do Camiño, que forma parte do programa do Xacobeo, é "algo máis que un festival", xa que "engarza con valores do Camiño" como "lugar de encontro e lugar de convivencia" para "todos os públicos". VIXILANCIA DO CORONAVIRUS A preguntas dos medios de comunicación sobre a posibilidade de que o festival se vexa afectado as recomendacións por mor da alerta por coronavirus --no caso de que se suspendesen eventos de masas--, o conselleiro mostrou a súa "confianza no sistema sanitario español" e pediu "prudencia", dado que se trata dun evento que terá lugar dentro de "case catro meses". "No caso hipotético, e non desexado, de que se manteña ou incremente unha situación que até o momento é a que é, o dereito dos usuarios está plenamente garantido", dixo Román Rodríguez, que mandou, no entanto, unha "mensaxe de tranquilidade". Aínda que actualmente o evento planéase sen incidencias e esta posibilidade é "moi remota", explicou que se, finalmente, "non fose posible celebralo", está a traballarse en protocolos relacionados con este tipo de eventos, comúns a toda España, para actuar e, en todo caso, "os dereitos dos usuarios están plenamente garantidos". |
Festival
Xa está aquí o cartel de O Son do Camiño 2020: Liam Gallagher, The Chemical Brothers ou Derulo
Os abonos para a cita, que amplía este ano o seu aforo, poranse á venda o vindeiro martes
