O conselleiro de Cultura, Roberto Varela, presentou hoxe na Cidade da Cultura 'Pequeclassics', un proxecto co que a Xunta pretende 'achegar o universo da música clásica aos nenos'.
Varela sinalou que este ciclo de concertos didácticos, encadrados na programación da Cidade da Cultura, foi ideado especificamente para un público infantil co fin de estimular nos nenos o gusto pola música, segundo informou a Consellería nun comunicado.
Segundo o conselleiro, serán espectáculos 'de alta calidade' e cunha clara orientación pedagóxica, ao ofrecer 'a aprendizaxe a través da diversión'.
Engadiu que a Cidade da Cultura traballa para se converter 'nunha referencia' dentro de oferta que existe para o público infantil en Galicia, e neste sentido lembrou a realización de actividades como o ciclo de teatro infantil 'Titemá', as visitas máxicas dos domingos ou os obradoiros didácticos.
'Pequeclassics', que se desenvolverá entre setembro e decembro, constará de catro concertos de alta calidade (un ao mes), con actores e recursos do teatro como vestiario e iluminación.
