Agora que deron comezo as rebaixas comerciais pode ser un bo momento para que a poboación rebaixe tamén as cantidades de residuos producidos e active desta forma o primeiro elo na xestión xerarquizada dos mesmos, que comeza coa prevención e a redución, continúa coa reutilización e a reciclaxe e culmina coa valorización, tanto material como enerxética, relegando o uso do vertedoiro a último lugar debido ao seu negativo impacto sobre o medio ambiente e a saúde.
As decisións dos cidadáns á hora de consumir condicionarán o resultado final. Entón, ¿qué podemos facer no noso día a día para que a xeración de refugallos se vexa minorada? Adoptando sinxelos xestos:
1.- Consome de forma responsable. Elabora unha lista do que verdadeiramente necesitas e cínguete a ela. Evita sucumbir a os caprichos superfluos que só che reportarán unha satisfacción inmediata e cuxo interese nos mesmos probablemente vaia decaendo co tempo, sendo o seu destino o cubo do lixo.
2.- Bota man dos produtos a granel. E de non ser posible, co menor envase e embalaxe. O envase non forma parte do produto que consumes, aínda que si engrosa o seu custo, coa particularidade de que acabará converténdose nun residuo.
3. Non esquezas as bolsas reutilizables para facer as túas compras. Lévaas sempre no coche, nun peto, no bolso. E tampouco esquezas a túa propia botella de vidro ou cantimplora para a auga que consumes cada día. Procura tamén que os manteis e panos sexan sempre de tea. Evita o uso de materiais de usar e tirar.
4. Realmente necesitas cambiar de teléfono móbil? Pénsao, e de ser así repárao ou adquire un reacondicionado.
5. Compra artigos de segunda man. Poden ser unha boa solución, pero con menor custo.
6.- Non acumules sen máis. Vende ou doa o que xa non precises. Outras persoas poderán sacarlle rendemento.
7.- Di non ao desperdicio alimentario. Compra con cabeza, adapta a cantidade de alimentos ao número de comensais, deixa que se sirvan eles mesmos e aproveita as sobras para novos menús.
8.- Autocompostaxe. Se habitas nunha vivenda unifamiliar que dispoña de terreo (horta y/ou xardín), aproveita os restos de alimentos non comestibles, así como restos vexetais, para elaborar compost, un abono natural de alta calidade que substitúe aos fertilizantes artificiais e que ademais de aportar nutrientes ao solo protéxeo fronte a pragas e diferentes enfermidades.
9.- Local e de tempada. Opta polos produtos producidos no teu municipio ou contorna e que sexan de tempada. Así evitarás a contaminación asociada ao transporte en longas distancias e fomentarás a economía e emprego local.
10.- Adopta o principio dos 3R. Que os tres erres (reducir, reutilizar e reciclar) formen parte do teu estilo de vida. Non só coidarás o medio ambiente e a saúde, senón que aforrarás diñeiro.
Cinco tipos de contedores con diferentes cores
- Son varios os tipos de contedores específicos nos que se deben depositar os residuos sempre co obxectivo dun mundo mellor. É por iso importante lembrar unhas normas básicas dunha sinxela aplicación. Neste sentido non está de máis ter sempre moi presente os seguintes pasos:
- - O contedor de cor amarelo está destinado a envases de plástico, latas e briks.
- - O contedor de cor azul está dirixido ao depósito de papel e cartón.
- - No iglú verde deben depositarse os envases de vidro (frascos, tarros e botellas)
- - O contedor de cor marrón (nestes intres en proceso de implantación) debe acoller a materia que sexa de tipo orgánica.
- - O contedor xenérico ten a función de ser o depósito da fracción do resto de residuos.
![]()
