A Consellería de Economía, Emprego e Industria renova o seu impulso á eficiencia enerxética na industria e os servizos, así como a súa aposta pola utilización das enerxías renovables no ámbito rural e da biomasa en empresas, administracións públicas e vivendas. En total, a Xunta concede axudas a máis de 1.800 proxectos, cun importe global de 13,5 millóns de euros, o que permitirá mobilizar 50 millóns. A resolución destas convocatorias públicas permitirá aos beneficiarios un aforro estimado de 8,5 millóns ao ano e reducir en máis de 30.000 toneladas anuais as emisións de CO2.
A Xunta, a través do Inega, vén de resolver estas catro convocatorias de axudas que teñen como obxectivo impulsar o uso de enerxías limpas e un mellor aproveitamento dos recursos enerxéticos. En concreto, trátase dunha convocatoria para promover a eficiencia enerxética entre empresas e autónomos, unha segunda para o uso de enerxías renovables entre familias e pemes, sobre todo no ámbito rural; e dúas máis para proxectos de biomasa en empresas, administracións públicas e entidades sen ánimo de lucro por un lado, e para os que executarán particulares nas súas vivendas por outro.
O maior número de expedientes que obtiveron axudas é o que está referido ao fomento da biomasa. Neste caso, a Consellería de Economía, Emprego e Industria concede apoios económicos por valor de máis de 7 millóns de euros para a execución de 1.375 proxectos. En concreto, a través de fondos europeos, catro millóns de euros diríxense a máis de 260 propostas presentadas por administracións públicas, empresas e entidades sen ánimo de lucro; mentres que 3 millóns máis serán para o desenvolvemento de máis de 1.100 iniciativas programadas por particulares para a utilización desta fonte de enerxía renovable, das cales 714 corresponden á instalación de caldeiras.
Neste sentido, esta terceira convocatoria de investimentos para a biomasa permite dar continuidade ao traballo realizado durante os anos 2014 e 2015, cando as axudas concedidas contribuíron á instalación de 2.000 caldeiras de biomasa.
Encadradas no desenvolvemento da Estratexia Integral de Impulso da Biomasa, as axudas para estas dúas convocatorias permitirán reducir os custos enerxéticos de familias, empresas e administracións en ao redor de 2,5 millóns de euros ao ano; mellorar a calidade de vida da sociedade; diminuír ao ano as emisións de CO2 en 19.100 toneladas e o uso de gasóleo en 6,33 millóns de litros; e crear emprego de calidade, mobilizando máis de 15 millóns de euros ao abeiro destas axudas á biomasa.
Enerxías renovables
A terceira orde de axudas corresponde a proxectos dinamizadores que se desenvolverán nas áreas rurais de Galicia e que permitirán a instalación de equipamentos de enerxías renovables, en concreto, de xeotermia, aerotermia e solar térmica. En total, son 195 proxectos, que serán desenvoltos por 168 familias, 15 pemes e 12 administracións locais, e que recibirán axudas por un valor total de 1,17 millóns de euros. En concreto, o investimento concedido polo Inega contribuirá a executar 82 iniciativas de aerotermia, 79 de xeotermia e 34 de solar térmica.
A contía das axudas oscila entre o 40% e o 75%, cun máximo de 50.000 euros para proxectos relacionados coa xeotermia e de 20.000 para a aerotermia e a solar térmica. As actuacións enmárcanse dentro do Plan de Aforro e Eficiencia Enerxética da Xunta que ten como prioridades fomentar a implantación de equipos de última xeración; reducir a factura enerxética das familias, que pode chegar ata o 70% no caso da xeotermia e a aerotermia; e diminuír o consumo de enerxías convencionais. Con estas axudas xeraranse 50 postos de traballo e mobilizaranse 5 millóns de euros, aforrando aos beneficiarios 243.000 euros ao ano en abastecemento enerxético e reducindo as emisións de CO2 en máis de 700 toneladas anuais.
Entre as convocatorias á biomasa e ás enerxías renovables, as axudas concedidas, por valor de 4 millóns de euros, permiten a preto de 1.300 familias mellorar a cualificación enerxética dos seus fogares.
A cuarta orde de axudas concedidas corresponde á resolución da convocatoria para o programa de eficiencia enerxética, dirixida a empresas e autónomos. É a que achega máis fondos, con 5,3 millóns de euros para a execución de 231 proxectos. A maioría das iniciativas céntranse na instalación e renovación de equipos que permiten o aforro e mellor aproveitamento dos recursos enerxéticos. Nesta orde, ademais, inclúense axudas para elaboración de auditorías enerxéticas que avalíen o proceso produtivo nos centros de traballo e propoñan medidas de redución do consumo; outras para a substitución de vehículos a gasóleo ou a gasolina por outros que empreguen enerxías limpas como gas natural, GLP ou hidróxeno; e dúas máis para a implantación de sistemas de xestión enerxética certificados conforme á norma ISO 50.001.
As axudas permiten sufragar ata o 30% do custo do proxecto, cun máximo de 200.000 euros por iniciativa, unha porcentaxe que alcanza o 40% nos casos nos que os beneficiarios sexan as pequenas e medianas empresas.A previsión é que con esta nova convocatoria se mobilicen 30 millóns de euros; que as emisións de CO2 descendan en 10.400 toneladas ao ano, aforrando ás empresas 5,8 millóns de euros ao ano no abastecemento enerxético; e que se creen preto de 250 postos de traballo, entre directos e indirectos.
Axenda da Competitividade
Este programa de axudas favorece o impulso da competividade na industria e o sector servizos, dentro da liña fixada na Axenda da Competitividade Galicia-Industria 4.0, a través da cal a Xunta xa ten investido 130 millóns no último ano e medio, máis do planeado inicialmente, aos que se sumarán outros 15 millóns conseguidos grazas á disciplina fiscal de Galicia. A folla de ruta industrial galega é unha Axenda viva, e neste senso estanse levando a cabo neste momento programas clave para a implantación da fábrica intelixente en Galicia.
Neste senso, vense de aprobar a primeira convocatoria da Iniciativa Captación de Investimentos, que apoiará grandes proxectos de máis de 20 proxectos de I+D+i sobre a fábrica intelixente e as súas tecnoloxías.
Tamén se resolveu o Concurso de Ideas Industria 4.0, que gañaron os proxectos agrupados presentados por Ceaga, o Clúster da Madeira, Clusaga e Asime xunto a 38 pemes galegas, e que permitirá implantar nestas compañías proxectos de eidos como a robótica ou a loxística 4.0. O concurso permitirá mobilizar investimentos de 7,5 millóns de euros, como primeiro paso para sumar ás pemes á revolución industrial que supón a Industria 4.0.
A Xunta analizará coas empresas a posta en marcha de novas iniciativas no marco da Axenda, como novas Business Factories como a que o Goberno galego ten posto en marcha no eido da automoción, ou plans para impulsar a subministración de produtos galegos ás grandes compañías tractoras.
