Ana Pontón: “Galiza non pode converterse nunha colonia enerxética dos madrileños"

Ana Pontón (Sarria, 1977) cre que o Bloque Nacionalista Galego, formación que dirixe dende 2016, está “no seu mellor momento” xusto agora que chegan as eleccións municipais o 28 de maio, uns comicios para os que “non poño teito”. As propostas dos nacionalistas serán o tema central da conferencia-almorzo que dará a líder do BNG no Foro La Región, este xoves, ás 10,00 horas no restaurante Sanmiguel. Pontón será presentada polo candidato nacionalista á alcaldía de Ourense, Luís Seara. Cales son os retos máis importantes que afronta Galicia? Temos moitos, pero hai tres principais. O primeiro é enfrontar a transición enerxética. Dende o BNG temos unha posición moi clara: non podemos permitir que Galiza se converta nunha colonia enerxética de Madrid e que a nosa enerxía se poña ao servizo dos lobbies eléctricos. Temos claro que a transición enerxética é unha oportunidade que pasa porque a enerxía ten control público, pola protección do medio ambiente e do medio rural e polo retorno claro dos beneficios para o territorio. O segundo é a crise de prezos. Non se están a tomar medidas eficaces contra a inflación, e están a repetirse os mesmos erros da pasada crise. Temos que saír desta con máis industria, con máis músculo innovador e cunha aposta clara por un novo modelo económico. O terceiro reto é manter a calidade dos nosos servizos públicos. Temos contra as cordas a nosa atención primaria e temos que ir a un modelo no que non haxa esperas de ata 15 días para ver ao médico de cabeceira. O presidente Rueda anunciou esta semana que fixarán un canon co que gravar a eólica mariña. Cal é a postura do BNG? No caso da eólica mariña, non pode ser que o desenvolvemento da produción eólica acabe cun sector estratéxico para Galiza como é o mar. Falamos de 64.000 empregos directos, unha columna vertebral dende A Guarda a Burela. O que sabemos é que estes parques eólicos, como o experimental que se fixo en Viana, aniquilan o peixe. Así, o PP pon por diante dos intereses do sector pesqueiro os intereses das eléctricas. Non pode ser que o PP traizoe ao sector da pesca e lle entregue o noso mar ás eléctricas. Que balance fai dos seus case tres anos como líder da oposición? Asumimos o liderado da oposición con humildade pero tamén con ambición, sabendo que o BNG é a alternativa real ao PP. Nestes tres anos demostramos que temos un proxecto de goberno para darlle un futuro mellor a Galiza. O preocupante é que levamos tempo vendo como nos quedamos atrás: pola crise demográfica galopante, porque cada vez hai menos xente nova e seguimos sufrindo a emigración, porque temos menos músculo industrial e hai unha falta absoluta dunha folla de ruta para o país. Non estamos quedando atrás porque non teñamos potencialidade, senón porque temos un goberno que está sen impulso. Creo que o Bloque está no mellor momento da súa historia e que temos a oportunidade en 2024 para ter por primeira vez a presidencia da Xunta. Neste tempo marchou Feijóo e veu Rueda. Notou algunha diferenza? Se con Feijóo tiñamos un goberno sen impulso, agora temos un goberno sen rumbo. Vese que hai unha falta de proxecto e que o PP está nun declive claro, pero o seu declive non pode significar tamén o de Galiza. Hai que poñer en marcha o cambio. É esa falta de rumbo na que se baseou para afirmar que estamos a presenciar o ocaso do PP? Dinnos que son grandes xestores pero resulta que hai listas de espera de ata 15 días para ver ao médico de cabeceira. Temos 194 concellos sen pediatra. Dóase material de última tecnoloxía para poder mellorar os diagnósticos e tratamentos dos cancros e resulta que non hai un espazo onde colocalo e rematan nun hospital privado. O que vemos é un goberno nefasto que triplicou a débeda pública, que nos fai perder músculo industrial e que non ten proxecto de futuro. Co PP Galiza está retrocedendo e o BNG é a única forza política que pode cambiar o rumbo do país. O BNG goberna en 28 concellos galegos, cinco deles en Ourense. Cal é o obxectivo de cara ao 28M? Estas municipais son un reto moi importante. Temos un proxecto claro que se ve nos concellos que gobernamos, referentes en política municipal. Os concellos do BNG son os que máis premios levan, e iso é porque hai unha xestión eficaz e porque cando chegamos ao poder poñémonos a traballar para transformar os concellos. Imos multiplicar a representación e o apoio ao BNG e estamos convencidos de que imos ter un resultado histórico, sendo a forza política que máis suba. Ten algunha cifra na cabeza? Non quero poñer límites. Teme a chegada de Vox a Galicia? Creo que os galegos están moi lonxe dese discurso antigalego, machista, xenófobo e racista que representa a extrema dereita. Deixárono moi claro porque non ten ningún representante nas institucións deste país e creo que vai seguir sendo así. Máis da metade dos ourensáns non aproba a xestión de Gonzalo Pérez Jácome. Apróbao vostede? O BNG está sendo claro, a través do noso portavoz, Luís Seara: este é un dos peores gobernos da historia da cidade de Ourense. Pero non é só responsabilidade de Jácome, senón tamén do PP, ao que non lle importou poñer á fronte da cidade a un alcalde que Feijóo definiu en precampaña como letal. Ese prognóstico cumpriuse. Agora é o momento de que os veciños falen e dende o BNG ofrecémoslle unha alternativa de futuro a Ourense. Estou convencida de que vai haber moitas sorpresas en Ourense. Seara é o único candidato, a excepción do alcalde, que está hoxe dentro do Concello. Cre que os veciños llo terán en conta á hora de votar? Si. Nas eleccións estamos vendo que hai quen defende propostas do pasado e quen facemos unha aposta por unha persoa coma Luís, que coñece ben o Concello, que ten feito un traballo serio nestes catro anos, sen perder os nervios e demostrando que ten paixón pola cidade. Pode ser Seara o próximo alcalde? Traballamos con ese obxectivo e temos unha gran oportunidade. É unha cidade que se parece moito a Pontevedra antes da chegada do BNG, que estaba sen impulso e hoxe é referente grazas ao BNG. Podemos facelo en Ourense. Estráñalle que Paco Rodríguez estea máis pendente de pactar con Cabezas que de buscar unha alternativa co BNG? Cadaquén coñece a súa folla de ruta. Nós temos claro que nunca imos pactar coa dereita caciquil. Imos traballar para encabezar unha alternativa que recupere o orgullo de ser de Ourense. Ve posible un cambio na Deputación? É absolutamente necesaria unha rexeneración democrática na Deputación. Nas pasadas eleccións estivemos a piques de conseguilo e foron pactos escuros nos despachos do que dixera que nunca ía pactar con Baltar os que non o permitiron. Estas últimas semanas coñecemos un novo atraso no proxecto da intermodal de Ourense. Como cre que se senten os ourensáns cando lle negan infraestruturas coma esta ou a A-56? Os diferentes gobernos, sexan do PP ou do PSOE, cando se trata de Galiza, sempre veñen con atrasos e escusas; e non podemos permitilo. Cremos que sobre a intermodal hai que debater sobre o como, onde e con que características. Fomos moi críticos con este proxecto porque nos parece insuficiente para a cidade. Tamén cremos que hai unha falta de visión á hora de aproveitar as infraestruturas que xa existen. Anunciouse ducias de veces que ía haber un plan para rendibilizar a chegada do AVE a Ourense e quedou só en titulares. Falando de potencial, sempre se fala do potencial do termalismo, pero semella que nunca remata de explotar. Hai que abrir un debate sobre isto? Creo que máis que un debate, o que hai é que facer. O BNG, cando tivo responsabilidades a nivel municipal, elaborou propostas concretas para poñer en valor o termalismo. Necesitase unha aposta real: menos estudos e máis facer.