O Bloque Nacionalista Galego (BNG) levará iniciativas ao Parlamento e aos concellos nos que ten representación para pedir ao Goberno galego que garanta as quendas nocturnas nas oficinas de farmacia, xa que, denuncia, se está a priorizar a 'marxe de beneficio' das farmacias 'a custa de empeorar o servizo' aos usuarios, especialmente, no medio rural.
En rolda de prensa, a voceiro de Sanidade na Cámara galega, Ana Luisa Bouza; e o secretario de Acción Municipal da Executiva Nacional, Xoán Bascusas, presentaron estas iniciativas nas que, no caso da proposición non de lei, pide ao Goberno galego que 'utilice as súas competencias para que nas reorganizacións que se realicen das gardas nocturnas das oficinas de farmacia se garanta o servizo en todos os concellos galegos'. No caso da moción engade a necesidade de comunicar o acordo municipal, de alcanzarse, ao presidente da Xunta e aos grupos da Cámara autonómica.
Durante a súa intervención, Ana Luisa Bouza explicou que a entrada en vigor (o 1 deste ano) da Lei de Acompañamento está supoñendo 'a desaparición das quendas nocturnas de farmacias no rural galego', aínda que tamén se coñecen algún caso en Vigo. Segundo os datos que manexa a parlamentaria, esta lei podería alcanzar o 70 por cento dos concellos galegos.
A xuízo de Bouza, esta medida 'ten só un obxectivo: garantir a marxe de beneficio das farmacias', 'posto que, tal e como explicou, non afecta ás contas públicos, non supón unha rebaixa do presuposto e, dende logo, non mellora o servizo'. Neste sentido, puxo enriba da mesa o feito de que coincide no tempo cunha redución dos beneficios tras a entrada en vigor do catálogo de medicamentos e o establecemento de novos prezos de referencia, e co feito de que se'están a atrasar' pagamentos a farmacias, o cal as obriga a pedir créditos.
En todo caso, a deputada do Bloque incidiu en que 'a marxe de beneficios das farmacias non se pode garantir a custa de empeorar un servizo', o cal, en palabras de Xoán Bascuas, evita en ocasións o desprazamento a un centro de saúde debido á asistencia que tamén prestan os farmacéuticos ante algunhas preguntas.
SE SUMA A OUTROS RECORTES
De feito, Bascuas subliñou que este tipo de medidas 'prexudica á poboación que ten máis dificultades para acceder a estes servizos e con menos recursos', especialmente, á que vive no medio rural, xa que se suma aos 'peches das quendas de verán, os recortes no transporte sanitario urxente ou a eliminación das unidades móbiles do programa de prevención de cancro de mama'.
Así as cousas, o secretario de Acción Municipal fixo un chamamento aos grupos municipais do PSOE e o PP, así como outras forzas políticas, para que se faga política 'pensando nas persoas', posto que está a 'romper o principio de igualdade en acceso a un servizo público como é o da atención sanitaria'.
