Estas posturas veñen dadas pola citación do secretario xeral do PSdeG a declarar como imputado no caso O Garañón.
Críticos do PSdeG consideraron necesario "recoñecer" o "mal resultado" obtido pola formación en Galicia nas pasadas eleccións xerais nas que se converteu en "terceira forza" para "poder emprender a solución" e acusaron á actual dirección de "non ser capaz de construír un proxecto político de futuro".
Nun Comité Nacional ordinario no que houbo máis de 60 intervencións e que se prolongou ata case as 16,30 horas deste sábado, foron varios os cargos socialistas que cuestionaron o traballo da actual dirección, á que acusan de "dividir en lugar de unir".
"A dirección debe recoñecer que os resultados non foron bos, que nos convertemos en terceira forza nun escenario no que o PP caeu e o natural sería que nós subísemos", explicaron a Europa Press fontes presentes no Comité, que consideran que "se isto non se recoñece, dificilmente se lle vai poñer solución".
E é que, segundo explicou un dos militantes que tomou a palabra, son diversos os simpatizantes e membros do PSdeG que censuran a forma na que se elaboraron as listas para os pasados comicios e tamén como se levou a cabo a campaña.
"Onde non había un incendio, montouse", sinalaron as mesmas fontes para cargar contra a xestión do secretario xeral, José Ramón Gómez Besteiro, e da secretaria de Organización, Piar Cancela, á que, conforme indicaron, algúns militantes chegaron a pedir que dimitise.
Neste sentido, lamentaron que "en tan pouco tempo" Besteiro "perdera o grande crédito que lograra cando foi elixido secretario xeral". "A sensación é de tempo perdido para os que pensabamos que viña a coser o partido e, ao final, o descoseu", apuntaron.
ANUNCIO DE PRIMARIAS
Así mesmo, tamén foron varios os cargos do PSOE que coincidiron nas súas intervencións ao considerar que é necesario celebrar primarias para elixir o candidato socialista á presidencia da Xunta, eleccións internas que, segundo adiantou Besteiro este sábado, se convocarán nun Comité Nacional Extraordinario que terá lugar en febreiro.
Esta coincidencia na aposta polas primarias, segundo explicaron presentes no Comité, é vista como a "evidencia" de que "algúns pensan que Besteiro non debe ser o candidato". "A xente e o Partido Popular non van esperar polo PSOE, os asuntos xudiciais persoais non poden estar diante dos xenerais", consideran sobre citación do secretario xeral do PSdeG a declarar como imputado no caso O Garañón.
Con todo, aínda que na súa intervención Besteiro non desvelou se se vai presentar a estas primarias, fontes da dirección do partido deixaron claro que o actual socialista en Galicia prevé presentarse, unha cuestión que "nunca estivo en dúbida".
