Galicia

Feijóo apoia o Clúster TIC para exportar marca Galicia e importar investimento

Galicia

Feijóo apoia o Clúster TIC para exportar marca Galicia e importar investimento

O presidente da Xunta, Alberto Núñez Feijóo, expresou hoxe o seu compromiso co Clúster TIC Galicia, que hoxe presentou o seu plan estratéxico 2011-2013, para lograr que a Comunidade viva o 'presente dixital' e acreditar con solvencia a marca Galicia, ademais de atraer investimento e ideas.
O plan estratéxico do Clúster TIC aspira a minimizar a brecha dixital 'moi difícil de superar', explicou o presidente desta asociación empresarial, Rafael Valcárcel, quen avogou por un pacto tecnolóxico-industrial no que 'caibamos todos' para evitar 'destruír prezos' pois, advertiu, co 'abaratamento por sistema periga a calidade do servizo'.

De aí que as ideas centrais do plan pasen por reforzar o Clúster, incrementar a competitividade e promover un crecemento da cifra de negocio nun ámbito que, en Galicia, aspira a chegar ao 4% do PIB desde o 2,7% actual, con 1.800 empresas, que factura 2.500 millóns de euros e emprega 15.000 persoas, precisou Valcárcel no Centro Social de Caixanova en Compostela.

Neste sentido, as claves do éxito fixado neste marco implican o recoñecemento do Clúster das Tecnoloxías da Información e Comunicación, unha visión compartida polo sector, colaboración e un modelo de gobernación medible e transparente.

Consolidar a solvencia da marca Galicia no sector TIC, que sexa única, como o é por exemplo na pesca, é para o presidente galego o obxectivo da Xunta neste ámbito coas premisas de 'fusión e coordinación', competitividade e cos 'mellores'.

'Galicia ten a oportunidade de xerar unha marca de solvencia para atraer investidores e ideas', reiterou o xefe do Executivo autonómico, quen se mostrou partidario de crear as mellores condicións para impulsar solucións innovadoras cun alto impacto no Produto Interior Bruto da Comunidade.

Ao fío diso, lembrou outras iniciativas da Xunta neste ámbito, como a Axenda Dixital ou o Plan Galego de Investigación, Innovación e Crecemento, e asegurou que nun ano se reduciu nun terzo a brecha dixital en Galicia.

A Xunta abordará cubrir este proxecto ambicioso nun momento de restrición económica, priorizando os investimentos e tecnoloxías, de maneira que teñan un 'oco' na axenda do Goberno e na economía produtiva de Galicia.

'Temos empresas, temos coñecementos, temos experiencia e temos que competir, innovar' e 'non desaproveitar a oportunidade histórica' que ten Galicia neste momento, recalcou Feijóo, quen espera moito deste plan que compatibiliza o sector público e privado e que forma parte dunha política 'imprescindible'.

Por esa razón, subliñou que 'todos os proxectos viables teñen que ter financiamento' e, ademais do recentemente creado fondo de capital risco con 100 millóns de euros, entre outras iniciativas, aludiu á articulación de recursos económicos para apoiar o desenvolvemento empresarial do sector tecnolóxico con novos apoios.

Novas vías de apoio financeiro 'fronte ao gastado modelo de subvención a fondo perdido', indicou Núñez Feijóo, quen animou os emprendedores 'con ideas' a presentarse a proxectos do fondo tecnolóxico que podería mobilizar 200 millóns de euros.

Non obstante, sinalou que 'os poderes públicos non podemos ser os únicos que lideremos ese proxecto deixándolle ao resto o papel de espectadores', aínda que reiterou o compromiso do Goberno galego de unir instrumentos e medios para impulsar unha estratexia única das TIC en Galicia como unha 'acción de Goberno'.

Neste contexto, defendeu esta iniciativa empresarial para afrontar 'de forma coordinada' este reto de 'envergadura e grandes oportunidades' no que 'é crucial' a implicación de todos para que ninguén estea en 'risco de exclusión dixital', compromiso que o levou a asegurarlles aos emprendedores que 'non estaredes sós'.

En definitiva, continuou, trátase de fusionar vontades, forzas e obxectivos para incrementar a competitividade do sector e lograr un cambio no modelo produtivo cara á 'inevitable' economía do coñecemento, cun marco común de financiamento, da factoría de emprendedores e de aliñar necesidades tecnolóxicas do sector público e produtivo e as ofertas tecnolóxicas.

Núñez Feijóo concluíu a súa intervención coas súas expectativas depositadas no sector e coa confianza de que a Xunta 'estea á altura' das deste colectivo empresarial.