Así o comunicou Caballero despois de manter este xoves unha reunión con representes da compañía aérea
A aerolínea Iberia Express reforzará o próximo ano a ruta Vigo-Madrid con catro frecuencias semanais máis e formulou ao alcalde de Vigo, Abel Caballero, a posibilidade de implantar a conexión Vigo-Londres, concretamente ao aeroporto de Heathrow.
Así o comunicou Caballero despois de manter este xoves unha reunión con representes da compañía aérea, que dende este sábado, 18 de xullo, volverá operar a ruta Vigo-Tenerife, cun voo á semana todos os sábados.
Caballero destacou que conseguir esta ruta a Londres permitiría chegar ao "aeroporto con máis conectividade do mundo", polo que van estudar "con interese" a proposta e analizar as condicións nas que se implantaría.
"É unha ruta que perderamos porque o Bloque nolo puxo como condición sine qua non para aprobar un presuposto, como o Partido Popular opinaba o mesmo perdemos a ruta", mantivo o edil, que criticou que ambos os dous partidos "condenaron a Vigo a quedar sen algo tan importante como o Vigo-Londres en Heathrow".
Así as cousas, recordou que esta liña se sumaría ao Vigo-Londres operado por Air Nostrum co aeroporto de Luton, que "ve francamente ben" e que, de feito, a aerolínea propuxo ampliala máis alá do verán "e mesmo nun día máis".
Con todo iso, o aeroporto de Peinador operará en 2015 rutas con Tenerife, Madrid, Valencia, Ibiza, Palma, Barcelona, París -de momento-, Bilbao, Grande Canaria, Sevilla, Londres, Málaga; ás que se sumarán en 2016 Bruxelas, Roma, Alicante e Menorca.
O rexedor asegurou que están satisfeitos porque "as compañías queiran operar Vigo", a colación do que subliñou que "todas as compañías aéreas importantes de España e algunha estranxeira queren voar en Vigo: Volotea, Air Nostrum, Iberia Express, Air Europa, Vueling".
