A empresa pública analiza o as novas retribucións da coxeración e os rexedores temen outro encarecemento do servizo.
A suba do canon de Sogama, que encarecerá a factura un 33,5% para os concellos, entrará en vigor este sábado, entre protestas de boa parte dos alcaldes e a ameaza dun centenar deles de pagar a tarifa aplicada ata agora máis o incremento do IPC, pero non o aumento recollido nos presupostos galegos para 2014.
As contas públicas presentadas pola Xunta a finais de 2013 incluían un incremento no canon que a Sociedade Galega do Medio Ambiente (Sogama) cobraría aos concellos aos que presta servizos de recollida de lixos, 296 municipios cunha poboación de 2.316.000 habitantes, dende o comezo do ano. A Fegamp e a Xunta formularon posteriormente atrasar a suba ata xullo, pero a emenda aprobada finalmente no trámite parlamentario situou a data de inicio en marzo.
Un grupo duns 100 alcaldes críticos organizáronse contra a medida e, ante a inminencia da aplicación, advertiron de que non asumirán a suba. "Imos pagar o que pagamos agora máis o IPC", manifestou o alcalde de Monforte (Lugo), o nacionalista Severino Rodríguez, a Europa Press.
Pola súa banda, o rexedor do Barco (Ourense), Alfredo García (PSdeG), matizou que se trata dunha posibilidade que "se está a mirar" e os alcaldes pediron informes xurídicos sobre as consecuencias que podería ter non pagar a suba e, así, determinar "o camiño a seguir".
"Temos tempo ata que chegue a primeira factura para tomar unha decisión", indicou. Sogama pasa o cargo con periodicidade mensual e o correspondente a marzo deberá chegar nos primeiros días de abril. Fontes de Sogama replicaron que a postura da empresa pública foi sempre a mesma cos concellos "morosos" e é "recorrer á vía xudicial".
CALENDARIO DE PROTESTAS
Pola súa banda, estes case 100 alcaldes --"todos os que non son do PP", segundo Severino Rodríguez-- acusan á Xunta de "negarse en redondo" a negociar, en palabras de Alfredo García, quen reafirmou que se mantén o calendario de protestas. O primeiro dos actos, recordou, será unha concentración o próximo 11 de marzo ante o Parlamento de Galicia, coincidindo coa celebración do pleno.
Ese día, os alcaldes decidirán as seguintes mobilizacións, entre as que o rexedor de Monforte prevé un encerro nas instalacións da Xunta en San Caetano. Ademais, Severino Rodríguez indicou que o recurso xudicial contra a suba do canon "se está a preparar" e analizan se se pode presentar de forma conxunta.
O PSdeG e o BNG levaron á comisión executiva da Fegamp a proposta de interpoñer a través da federación un recurso xudicial contra a medida de Sogama, pero os votos dos alcaldes do PPdeG impediron que a petición saíse adiante.
CAMBIOS NA RETRIBUCIÓN DA COXERACIÓN
Este aumento no que Sogama cobra aos municipios supón un incremento máximo de 12 euros anuais por inmoble (un euro mensual), segundo os cálculos da administración autonómica. Sogama xustificou a decisión polos cambios provocados pola reforma eléctrica estatal.
De feito, a empresa pública está a analizar o impacto que terá a proposta de novos estándares retributivos da coxeración feita polo Ministerio de Industria. Polo momento non ten conclusións, posto que o documento é un borrador e aínda se poden presentar alegacións a este.
Neste contexto e ante a previsión de que se recorte a retribución á coxeración, algúns alcaldes manifestaron o seu temor a que Sogama aplique outro incremento na factura. En concreto, Alfredo García, manifestou que a posibilidade "existe".
