O primeiro dos voos afectados foi un charter procedente de Alxer e que tiña reservado a aterraxe en Peinador ás 6,30 horas. Debido ao vento, a aeronave foi desviada a Madrid
A borrasca profunda `Ana` que este domingo obrigou a activar o aviso vermello en varias provincias galegas por ventos e choivas provocou que se desviasen cinco avións que tiñan previsto aterrar en Vigo. Ademais, tamén se cancelaron outros tantos despegamentos desde a cidade olívica.
Segundo informaron a Europa Press fontes de Aena, o primeiro dos voos afectados foi un charter procedente de Alxer e que tiña reservado a aterraxe en Peinador ás 6,30 horas. Debido ao vento, a aeronave foi desviada a Madrid.
Tampouco puido aterrar na terminal viguesa a causa do vento outro voo procedente de Madrid que chegaba á cidade ás 7,55 horas e tivo que regresar ao aeroporto de partida. Este feito provocou a cancelación do percorrido inverso, Vigo-Madrid, que ía realizar esta nave ás 8,45 horas.
A maiores, outros dous voos procedentes da capital do Estado que tiñan previsto aterrar en Peinador -ás 13,40 e 16,40 horas- foron desviados a Santiago de Compostela. Por iso, as súas respectivas saídas desde a terminal viguesa cara a Madrid foron canceladas.
OUTRAS CANCELACIÓNS
Tamén se cancelou a saída doutro avión desde Madrid cara a Vigo, o que motivou tamén que os pasaxeiros que tiñan previsto coller ese avión cara á capital do Estado de volta tampouco puidesen facelo.
Ademais, outro avión que cubría a ruta Lisboa-Vigo, foi desviado ao aeroporto portugués de Sá Carneiro, no Porto.
Con estes datos, Aena destacou que, até as 17,30 horas só se puido operar unha saída desde o aeroporto de Peinador. A estas alturas do día, quedan pendentes catro chegadas e tres saídas.