O PSdeG critica "o mantra da planificación" e di que "estaría ben se os fondos fosen suficientes"
O secretario xeral de Universidades, José Alberto Díez de Castro, negou este venres que a Xunta estea a incumprir o plan de financiamento das universidades e explicou que se "detraen" fondos baseándose nas previsións de incremento de ingresos pola suba das matrículas --no caso de Galicia, non aumentaron na primeira, pero si na segunda, terceira e cuarta-- e, cando os centros presentan as certificacións, se "compensan" as cantidades.
Así o dixo en comisión parlamentaria, en resposta a unha pregunta da deputada do PSdeG Concepción Burgo, que sinalou que nos presupostos de 2013 se retiraron ás universidades galegas 5 millóns en concepto de suba de matrículas. Pero, continuou, posteriormente a Xunta decidiu conxelar as taxas de primeira matrícula, polo que "non se puido producir un incremento de ingresos". En 2014 aconteceu o mesmo, pero a cantidade é de 2 millóns, engadiu.
Por iso, a socialista considerou que, "ou ben as taxas subiron e con iso os ingresos das universidades, ou ben non subiron e retiráronselles fondos ás universidades do plan de financiamento".
Díez de Castro contestou reinvindicando que o plan plurianual de financiamento que se aplica en Galica permite ás universidades saber "o presuposto co que van contar durante cinco anos". No texto pactado cos tres centros galegos, sinalou, incluíuse que quedaría suxeito ás adaptacións necesarias que se derivasen de medidas adoptadas polo Goberno central ou autonómico para cumprir cos obxectivos de estabilidade presupostaria.
En efecto, proseguiu, producíronse cambios que afectaron ao prezo das matrículas e, en decembro de 2012, a Xunta e as universidades acordaron que "anualmente se realizará a regularización dos créditos vinculados á subvención fixa do financiamento estrutural baseándose en certificacións achegadas polas universidades relativas ao incremento de matriculas". É dicir, que os fondos que achega o Goberno galego, que se consignan nos presupostos, se corrixirían na medida en que as universidades obtivesen máis ingresos pola suba das matrículas e que esa corrección se faría baseándose na información dos propios centros.
O procedemento acordado para facelo é que no último trimestre do ano as universidades comunican os ingresos extraordinarios previstos no curso vixente e, tomando estes cálculos como referencia, os presupostos da Xunta para o exercicio seguinte "regularizarán os créditos", que terán carácter provisional. No segundo trimestre de cada ano, xa finalizados os pagamentos de matrículas, deben remitirse as certificacións do recadado por incremento de prezos. "Nese momento procederase á regularización definitiva", puntualizou Díez de Castro.
RETIRADAS "PREVENTIVAS"
No caso de Galicia, engadiu, hai recadación excepcional "en primeira matrícula non, pero si en segunda, terceira e cuarta". "Cumprimos estritamente o plan e as universidades non teñen ningunha incerteza sobre a cantidade final coa que poden contar", defendeu o secretario xeral, que especificou que "o detraimiento preventivo se refire a unha previsión". En 2013, a estimación era de 6 millóns e "a cifra real que certificaron as universidades no seu conxunto foi de 2,8 millóns e compensouse ás universidades", mentres que para 2014 a previsión foi de 3 milones e está pendente de comprobar nos próximos meses.
Pola súa banda, Concepción Burgo criticou que a Xunta insista no "mantra da planificación", algo que "estaría ben se os fondos recibidos fosen suficientes". Ademais, preguntouse "por que, se todo foi de acordo, as universidades están continuamente protestando pola política presupostaria que non lles permite desenvolver o seu traballo".
"Non hai problema que se formule que vostede defenda unha opinión ou unha xestión súa, sempre de todo a culpa é dos demais", recriminou Burgo ao secretario xeral, que replicou que neste caso non busca "culpables porque non hai problema". Ademais, tras defender a socialista que se hai máis ingresos, deberían quedar nas universidades, Díaz de Castro replicou que en toda España, se aumentan os ingresos, "nunca quedan a disposición das universidades", senón que "se produce simultaneamente unha diminución das achegas" das comunidades.
