Dietario ou novela

Dicía Camilo José Cela, tan semiesquecido hoxe que alporiza, que novela é todo aquel libro que baixo do título admite, entre parénteses, semellante definición. Ramón Loureiro, así e todo, autor el mesmo de novelas, non termina de se chamar ao ou do xénero. O seu, máis ben, é andar do xornalismo (reportaxe, opinión) á narrativa, mais tomando notas de canto ve ou pasa á beira ou ao redor seu, con estilográfica, por favor, para escribir dietarios, cal este que teño diante miña, que sen desprezar a confesionalidade fan desta asunto menor. Se cadra porque as anécdotas renden contas ás categorías. As que frecuenta, polas que se move este autor, coa facilidade coa que o facía aquela oca que viñera parar onde o Río Belelle. Ese que desemboca na Ría de Ferrol, pouco despois de que o faga o Xuvia, sementador da devandita ría. Non, a oca de marras non está no libro que me ocupa, mais nel hai toda caste de animalia e cristiáns. Mesmo sae Deus, porque Ramón Loureiro é católico, e esta é xustamente unha das súas grazas, o non agachalo, digo. De maneira que neste libro mixto hai, tamén, apelacións á divinidade, bretemosa cal as estradas de Escandoi, ese reino faulkneriano ou benetiano que Ramón Loureiro ten coroado (con loureiro, de colleita propia, lástima fora). O último libro loureirano, en puridade sempre o mesmo, ter un mundo propio chámase a figura, fala de lecturas, paisaxes, rúas e prazas, catedrais ou igrexas, personaxes certos ou maquinados, todo visto e revisitado como cuns prismáticos máxicos, con lentes a virar cal caleidoscopios, que isto é o Ramón Loureiro, un nachiño, dicimos pola banda de Ferrol, con cousas dun Merlín “à la page”. Mais isto porque esta escrita, de gran calidade de páxina, de fondura conceptual, é do melloriño que se anda a facer en Galicia. En galego ou en español, que nas dúas linguas que por aquí se fala escribe este cabaleiro, sen máis montura, cando as tivera, que unhas zapatillas craveteadas. Case como as do atleta soviético Vladimir Kuts, cinco ou dez mil metros, tanto ten, en Melbourne, unha das semblanzas máis certeiras do libro escrito por este corredor de fondo da literatura. Por iso, dietario ou novela, que máis nos ten igualmente, se o remate é óptimo. Libro Las máscaras del fin del mundo | Editorial Medulia | Autor Ramón Loureiro | Precio 18 euros.