O horto de Landero

Refírese Luis Landero no título do seu último libro a ese horto tan persoal, do que falara o escritor norteamericano, Ralph Waldo Emerson, que todos temos e debemos facer medrar a teor das nosas posibilidades. Fala Landero dunha lectura primitiva de Emerson; neste libro fálase de moitas lecturas, tamén do Faulkner de “The Hamlet”, “El villorrío”, tal como o coñeceremos aquí naqueles variopintos “Clásicos universales”, de Plaza y Janés. E xa que a memoria pode enganar (se tal, felizmente, poisque este libro está cheo de memorias) o que Landero lembraba no horto de Emerson eran leitugas. Logo semella que non, mais tanto ten. O que non dá igual é o sosego que nos produce este libro, de algunha maneira continuación de El balcón en invierno, por máis que desta volta o Landero vaia a Alburquerque, Badajoz, a súa vila natal. Ao seu pobo, tamén aos seus familiares, tan boiando, tan incrédulos de que aquel rapaz langrán, guitarrista e “macarrilla” sexa quen de escribir libros de tanto éxito (el será a súa muller, como sostén unha das primas landerianas, centenaria xa). Éo tamén, en saberes, en hábitos e costumes populares este autor, que tanto éxito tivera con Juegos de la edad tardía, e que logo de novelas varias ten atopado un camiño, que tanto me gusta frecuentar, ao Federico Fellini (de “Amarcord”). E é que hai moito de fantasía, ás veces veciña de certo surrealismo mol, nestes cadros extremeños (con ampliación madrileña, Barrio de la Prosperidad, entrada do Landero a outro mundo que habería lévalo a París, e volta e media). Agradézolle a Landero que non nos canse con esas árbores xenealóxicas que nos guindan outros autores. O de Luis Landero limítase ao que viran os seus ollos de cativo, tan activos e bulidores como esa vila, pequena e moi traballadora (seitor mulleres, os homes, a outra cousa, disque, o que non quere dicir que fosen lacazáns, entendáseme). Un mundo pequeno cal os moños das femias, cada vez máis reducido segundo a idade faise maior. Un libro maior, este, por máis que xorda dun material mínimo. Cal o horto de Ralph Waldo Emerson (Massachussets, 1803-1882), clérigo e teólogo. O que me leva pensar que no libro de Landero non saen cregos. Raro porque si se levaban daquela. Libro El huerto de Emerson |EditorIal Tusquets |Autor Luis Landero| Precio 19 euros.