Rochi Nóvoa nunca defrauda cando presenta. Non o fixo o pasado domingo en Verín, logo de achegar ao público da feira do Lázaro o que é xa a súa sexta publicación, o diminuto pero intenso poemario titulado "Instances".
No acto estivo arroupada polo músico José Manuel Salgado, quen lle proporcionou o acompañamento preciso á lectura da autora. Ao final, e como colofón, unha das artistas que tamén colaborou na edición cos seus debuxos, Paulinha de Arzoá, acabou cantando para os asistentes.
Rochi, a que se debe o título de “Instances"?
Na inmediatez do tempo no que estamos vivindo, pararse a ler poesía é moi custoso. Entón, dentro das leis dos mínimos, apareceu "Instances".
Na súa obra nunca pode faltar a mensaxe de loita, de combate. É este libro menos combativo?
Depende de como se mire. As miñas obras sempre son combativas, a superación, a rebeldía e a loita diaria están sempre presentes.
Pero tamén é moi importante o amor para vostede.
Todos estamos aquí, precisamente, como froito dese sentimiento (risas), ou nalgúns casos, como o meu, por auténtico despiste (máis risas). Pero non esquezamos que co amor tamén protagonizamos as máis encarnizadas e cruentas loitas. O amor declárase mediante a guerra, e os pulsos; é unha loita onde hai vencidos, vencedores, e onde hai sobre todo cobardes. Entón, escribir de amor é escribir tamén da guerra. Quen non loitou consigo mesma por amor?
Teño entendido que se adiantou a outro que tamén está en preparación.
Así é. Realmente vén a facer o sexto que publico en solitario, logo de "Muller de papel", "Farrapos de boneca", "Sen ti son eu" e "Cos pés na terra e a alma na lúa", que tamén tiña unha edición de peto. Aínda que "Instances" é un adianto dun traballo que teño pendiente con Xoel Gómez, Os Zenzar, Daniel Minimalia, O Reverendo Can, Eladino e Alexandre Cabanelas... un poemario máis laborioso e cunha prespectiva más ambiciosa.
Falando de librarías, onde podemos atopalo xa?
Como "Instances" chegou o sábado pola mañana, so nas que estiveron presentes na feira do libro e nas librarías Pedreira de Santiago e Nóbel, de Xinzo. Pero quen desexe mercalo ten o meu perfil de facebook para solicitalo, porque eu sempre quero saber a ónde van a parar os meus bebés.
Onde volveremos poder escoitar a Rochi?
O vindeiro sábado no café cultural Auriense, a partires das 20,30 horas.