A actividade enmárcase na programación do centro destinada ao fomento da lectura e á dinamización da propia instalación municipal
Este venres día 11 de novembro, de 18 a 19,30 horas, a Biblioteca Pública Municipal de Verín programa a iniciativa "Contos de Magosto". A actividade enmárcase na programación do centro destinada ao fomento da lectura e á dinamización da propia instalación municipal. O contacontos está dirixido a un máximo de 20 nenos, socios da biblioteca, e con idades comprendidas entre os 3 e os 9 anos.
A xornada consistirá na realización de contacontos e lendas, "como as narradas polos avós ao carón da lareira", ademais de manualidades sobre a mesma temática das historias de tradición oral, elaboradas con castañas, noces e pintura líquida. A actividade será coordinada, coma noutras ocasións, polos mozos voluntarios da Biblioteca Pública Municipal de Verín, que con idades entre os 11 e os 16 anos, axudarán ao persoal do centro municipal.
