Diego Martínez: "Tras o covid volvín a Oímbra, recuperei o amor polo rural"

Diego Martínez (Oímbra, 1996) con tan só 26 anos xa ten claro que quere vivir no lugar que o viu nacer. Aínda que pasou moitos anos fora e tocou diversos campos, como o relixioso, encontrou o seu lugar no campo e ao carón dos veciños, para axudalos e loitar polo seu querido Oímbra. Preséntase á alcaldía polo PSOE para mellorar o municipio, valorando o feito ata agora. Con só 26 anos encabeza unha formación política a nivel municipal. Si, animeime porque máis alá da idade, ten que ver con vivir e traballar aquí, que é cando ves as necesidades e cambios que estarían ben para o pobo e poder implicarse. Temos tendencia a pensar que o cambio non está ben, pero deberiamos considerar que son positivos e que se lle debían de dar oportunidades a todo o mundo e abrir a porta á xente moza. Enfróntase a dúas mulleres con experiencia na política. Sempre dá respecto porque hai que valorar o traballo de todo o mundo e por suposto, elas teñen moita máis experiencia en determinados ámbitos. Pero como digo, iso vaise adquirindo e hai que darlle oportunidades aos mozos, todos nos equivocamos e aprendemos, e por suposto, temos ganas de traballar. Estivo fóra e volveu a Oímbra, como é a súa vida agora? Tras a pandemia volvín a Oímbra, recuperei o amor polo rural que deixara atrás e instaleime a traballar no sector vitícola, agrícola e hostaleiro con moito orgullo. En ámbitos públicos de compromiso tamén teño experiencia: son o actual presidente da Mancomunidade de montes de Oímbra e o presidente da Asociación de veciños de Oímbra das festas do Entroido e da Santa Ana. O seu futuro está en Oímbra? O meu futuro, ao igual que o de moitos mozos, pasa porque duns anos a aquí quede vida. Despois cada un buscará unha alternativa. A mel, o sector vitivinícola, agricultura, castaños, autónomos, pequenas empresas en suelo industrial gratuíto, servizos sociais como unha residencia, manter a escola infantil e outros moitos aspectos son aspectos nos que se debe centrar a política municipal para que non desapareza o rural. Vexo que está moi implicado cos seus veciños. Sempre que acontece algo, son o primeiro en botar unha man se podo, aí estou, independentemente das cores políticas. Teño unha frase coa que explico a miña maneira de pensar: Se me pasa algo ou lle pasa algo a algún veciño, quen me vai axudar? En medio dun camiño perdido só, nin Feijóo nin Sánchez me van botar unha man, soamente o fará un veciño. Así que si, estou implicado co meu pobo. Esperan acadar bos resultados o 28M? O obxectivo é que se lle dea unha oportunidade a todos os partidos para que teñan un oco, xa sexa na oposición ou no goberno, para que todo o mundo poida aportar ideas e teña dereito a participar na política e que non haxa así monopolio de partido.