A Asociación de Empresarios de Verín (Aever) e Abanca renovaron o seu acordo de colaboración co foco posto en paliar as necesidades actuais dos negocios da zona mediante un catálogo de produtos e servizos deseñados para os asociados.
Así, Santos Álvarez, presidente de Aever, e María José López, directora da zona de Abanca en Ourense, firmaron o convenio este martes na sede da asociación verinesa, reforzando o compromiso do banco coa viabilidade e o crecemento económico da vila, que supón un dos focos de emprego principais da provincia de Ourense.
Co obxectivo de adecuarse ás demandas xeradas pola actividade diaria das empresas, no acordo inclúense solucións para as necesidades máis inmediatas. Ademais, a entidade bancaria pon á disposición das empresas e comercios un plan de financiamento, produtos e servizos que permitirán reforzar a competitividade dos proxectos e levar a cabo investimentos.
Os asociados a Aever tamén poderán acceder a pólizas de crédito, liñas de desconto comercial e avais. Así mesmo, os verineses accederán ao programa servizos da entidade, que permite o aforro nos servizos bancarios máis habituais. E a maiores, o banco ofrece o seu servizo de banca electrónica e TPV físico e virtual, este último de gran relevancia nos últimos tempos debido ao comercio por internet.
