As Escolas Deportivas de Ximnasia Rítmica de Verín iniciaron o curso escolar 2019/2020 con máis de 130 cativos inscritos. O proxecto, catalogado xa de "exitoso", naceu da demanda da propia cidadanía e dos pais, e contou co respaldo do Clube Deportivo de Ximnasia Rítmica e do propio Concello de Verín.
As actividades que engloba este club están destinadas a menores de entre 3 e 16 anos, divididos en dous grupos. Por unha banda, os menores de tres a seis anos gozarán de actividades físicas de base e, pola outra, os que teñan entre 7 e 16 practicarán a modalidade de ximnasia rítmica.
Entre os beneficios que proporciona a práctica deste deporte aos máis cativos, atópase a mellora da condición física e da flexibilidade, así como a estimulación da coordinación e da concentración. A ximnasia tamén axuda a conectar co espazo e o tempo, a coñecer o propio corpo e os seus movementos, e a corrixir malas posturas. Trátase dunha actividade física completa que se converte nunha alternativa "perfecta" para que os máis pequenos se manteñan activos mellorando así a súa calidade de vida, tal e como aseguran dende o Consistorio verinés, dende onde recordan que continúa aberto o prazo de inscrición.
