A oficina do Concello de Verín tramitou ao longo do pasado ano 2016 un total de 526 expedientes
A Oficina de Consumo do Concello de Verín presentou onte o seu balance oficial do que foi o exercicio 2016, destacando o protagonismo que tiveron as queixas por mor da mala praxis das diferentes compañías de telefonía. Segundo se destaca no seu informe anual, as atencións dispensadas -un total de 526 expedientes- ao longo do ano 2016 foron 95 consultas, 43 mediacións e 388 reclamacións que se enviaron a organismos como a Secretaría de Estado de Telecomunicacións, Banco de España, Comisión do Mercado de Valores, Industria, Instituto Galego de Consumo, Defensor do Asegurado, Xunta Arbitral de Consumo e Xunta Arbitral de Transportes.
No desglose, e mantendo a tendencia dos últimos anos, as telecomunicacións (telefonía fixa e móbil) e as relativas ao sector eléctrico son os sectores que máis problemas xeran aos verineses. 207 reclamacións, consultas e mediacións foron relacionadas coa telefonía, unha gran parte delas referentes as chamadas ou mensaxes de servizo Premium, enviadas pola oficina de consumo á Secretaría de Estado de Telecomunicacións. Os usuarios tamén denuncian o cobro por parte das operadoras de servizos que non teñen contratados, chamadas a unhas horas nas que o usuario non utilizou o móbil, cargos de cantidades superiores as que figuraban no contrato que a compañía ofreceu por teléfono, penalizacións inxustificadas, deficiencia nos servizos e, moi especialmente, mostran a súa desconformidade coa facturación.
No referente a internet, problemas de cobertura, baixa dos servizos e non aplicar as tarifas contratadas son os temas máis recorrentes. Por outra parte, 81 consultas foron relacionadas co sector eléctrico: cambio de compañía eléctrica porque ofrecen prezos máis baratos e logo non se cumpren, importes de facturas elevados, gastos de mantemento, entre outros.