O ilusionimos chega ao Auditorio Municipal de Verín, onde o vindeiro domingo, 24 de outubro, ás 19,00 horas, o Mago Teto realizará o espectáculo "O Camiño do Afiador", unha cita pensada para todos os públicos e que xira ao redor dunha roda de afiar dos anos trinta, herdada dos ancestros do protagonista.
O afiador, un oficio que tivo o seu apoxeo nos séculos XVIII e XIX -practicamente extinguido no século XX-, desprazábase centos ou milleiros de quilómetros por uns meses, mesmo anos, coa única compaña da súa roda. Así, miles de historias e aventuras doutros tempos chegan á escena coa axuda do ilusionismo.
"O Camiño do Afiador" enmárcase dentro do Programa de Dinamización da Lingua Galega "Falaredes 2021", dentro do Fondo de Proxectos Culturais Xacobeo da Xunta de Galicia. A entrada ao evento será libre e gratuíta ata completar o aforo.
