Os responsables do Museo de Verín buscan a colaboración veciñal para recabar información sobre a tradición da matanza do porco na comarca e impulsar un proxecto de investigación etnográfico colectivo para preservar a esencia social deste evento. Máis concretamente, o Museo de Verín pretende recuperar aqueles elementos sociais que marcaban as características deste ritual moi arraigado na vida rural e integrado nas tradicións de outras celebracións tan relevantes como o propio Entroido. A matanza do porco, "máis alá doutras posibles consideracións e da función de abastecemento de carne para o resto do ano", posuía un significado, din dende o museo, "como acto social fundamental na cohesión da vida rural e como símbolo de prestixio para as familias. Tanto é así, que as tradicións entorno á súa celebración constitúen unha das formas máis representativas da cultura popular galega".
Nos últimos tempos, o envellecemento da poboación, o éxodo do rural e os cambios sociais están a diminuír o número de matanzas en Galicia. Ante a súa "acelerada desaparición", faise "necesario" preservar "o seu significado social para a memoria colectiva futura", alegan no museo verinés, quen abriu todas as súas canles á conversa coa veciñanza para que ata o vindeiro 10 de xaneiro, veciños e veciñas poidan facer chegar as súas testemuñas para construír "a historia da comarca".
O envellecemento da poboación, o éxodo do rural e os cambios sociais están a diminuír o número de matanzas en Galicia.
