O Concello de Oímbra acordou no seu derradeiro pleno a súa adhesión ao Pacto dos Alcaldes polo Clima e a Enerxía, feito que levará a esta administración local a asumir os compromisos da Unión Europea en materia de clima e enerxía de cara ao vindeiro ano 2030. Ademais, logo desta incorporación, Oímbra contribuirá, pola súa banda, a acadar a Axenda 2030, unha folla de ruta que inclúe 17 obxectivos para o desenvolvemento sustentable.
Por outra banda, a adhesión ao Pacto dos Alcaldes implica tamén a adopción dun Plan de Acción polo Clima e a Enerxía Sostible que inclúe medidas para o freo do cambio climático consistentes na reducción de consumos enerxéticos e a substitución de enerxías fósiles por renovables, reducindo a pegada do carbono no municipio. As medidas aplicaranse sobre edificios, instalacións, equipamentos e transporte, tanto público como privado, e nos ciclos de tratamento de augas residuais e residuos sólidos urbanos.
Por último, o Plan de Acción implica o deseño de medidas de adaptación ao cambio climático, preparando ao Concello de Oímbra para facer fronte aos riscos e vulnerabilidades aparellados a este proceso. O Concello de Oímbra terá dous anos para aprobar este Plan de Acción e, cada dous anos, terá que dar conta dos seus avances na procura dos obxectivos previstos para 2030.