O conselleiro de Medio Rural, José González, anunciou a posta en marcha dunha consulta preliminar ao mercado para o proxecto de “aldeas intelixentes, solucións de futuro para aldeas sostibles”, unha iniciativa de compra pública de innovación da Consellería, que persegue obter 15 ideas innovadoras de orzamento de entre 500.000 e 1,5 millóns de euros para impulsar a recuperación dos núcleos rurais.
O conselleiro do Medio Rural avogou pola sustentabilidade e a intelixencia aplicadas “ás nosas aldeas de sempre” e destacou que neste ano se comezou a traballar na elaboración do Plan de dinamización das aldeas modelo de Muimenta (Carballeda de Avia), Penedo (Boborás) e Osmo (Cenlle) e que ao longo de 2022 porase en marcha o seu desenvolvemento.
O proxecto ten por obxectivo crear un territorio rural intelixente e contribuír aos retos de seguridade alimentaria e de asentamento da poboación no rural.
O proxecto presentado onte conta cun orzamento inicial superior aos 5 millóns de euros de fondos propios, que a Xunta espera poder ampliar con outras fontes de financiamento vinculadas a Next Generation UE ou ao programa FID do Ministerio de Ciencia e Innovación para acadar un orzamento global próximo aos 15 millóns de euros.
O proxecto persigue implementar na rede de aldeas modelo solucións innovadoras en catro liñas: desenvolvemento de servizos dixitais rurais, solucións para a bioeconomía en aldeas, sustentabilidade e aproveitamento da produción agraria en aldeas modelo (orientado á economía circular entre elas) e melloras no núcleo das aldeas modelo.
