Bieito Romero: “Temos que adaptarnos a estes tempos do covid con menos concertos"

A Insua dos Poetas está desenvolvendo unha intensa actividade cultural desde a inauguración do seu anfiteatro Nós ao aire libre. Mañá sera o escenario do concerto de Luar na Lubre, o grupo folk liderado por Bieito Romero. Que nos van ofrecer no concerto deste mércores? Serán pezas que forman parte do novo traballo que presentamos o pasado mes de xuño: "Vieiras e Vieiros. Historias de peregrinos. É unha combinación de música nova cos temas clásicos do grupo dos últimos 35 anos. É o noso decimonoveno traballo. O concerto terá unha duración de dúas horas aproximadamente, se non hai limitacións por parte da organización. Como lles está afectando esta nova realidade? É unha situación rara, estraña, bastante triste porque a música tal e como a coñecíamos con grandes concertos, agora é difícil. Temos que adaptarnos a estes novos tempos con menos concertos e ós novos requirimentos. Na cultura en xeral, e na música en particular, xa había problemas antes da pandemia, e agora aínda é máis difícil. Non cre que a cultura será como unha salvación da crise, como un refuxio para a xente? Creo que pode haber algunha excepción , pode haber algún sector que teña máis posibilidades pero non no noso caso. Tíñamos 100 concertos programados nesta xira do 2020 e parte do 2021, pero todo entrou nesta dinámica da problemática que crea o covid-19 porque a xente ten medo de estar en recintos pechados. Por iso penso que a cultura está nunha dinámica complicada, a cultura en xeral e a música tamén, xa que é un evento de masas e no inverno antes usábamos os teatros, pero agora as opcións de traballo van a ser moitas menos por causa das restricións, non podemos traballar con normalidade ao non poder encher os aforos, porque non sería rendable. Así que os problemas multiplícanse por dez. Na actual situación temos que vivir no día a día e iso na cultura é complicado porque hai que programar as cousas con tempo. Coñecía a Insua dos Poetas? Nunca estiven, a coñezo a través de fotografías e polo que me contaron. É un dos espazos privilexiados no verán pero no inverno complícase todo. Este verán tivemos xa algúns concertos ao aire libre. Acabamos de estar en Navarra nun bosque precioso, son concertos saudables e para nós é un pracer tocar neste sitio cargado de cultura. O problema de Galicia, a parte do covid, tamén é a climatoloxía, confiemos en que sexa favorable. Xa levan actuado varias veces no Carballiño. Que impresión levou deses concertos? Ourense, en certa medida, considero que é a miña terra porque meus pais son de Xunqueira de Espadañedo e Esgos, e sempre estamos moi vinculados coa provincia na que nos sentimos queridos. Co último disco sobre a Ribeira Sacra fixemos máis de 200 concertos promocionando a provincia. Teñen novos proxectos? Vieiras e Vieiros acaba de saír e estamos coa súa presentación. Xa tivemos varios concertos en Navarra, Zamora, María Pita, e tamén iremos a Fisterra e Lugo. Está por vir un inverno sobre todo incerto, pendiente das noticias ata que haxa unha solución que nos permita volver a normalidade. Hai que esperar e seguir traballando.