O Círculo de Podemos no Carballiño solicita ao alcalde de Beariz, Manuel Prado, que emita un comunicado sobre a existencia ou non de casos de persoas positivas en covid-19 entre os traballadores do Concello ou nos servizos que este presta. Tamén piden que explique os motivos do peche do Pavillón Polideportivo Municipal e o cese das actividades que estaban programadas no mesmo e os motivos polos que o servizo de teleasistencia ou axuda a domicilio non está a funcionar con todo o persoal pertinente, segundo afirma o Círculo de Podemos.
"Estes días vimos de recoller as inquedanzas de varios veciños de Beariz no tocante a un posible brote de covid-19 que presuntamente podería afectar a varias persoas traballadoras do Concello de Beariz", matiza esta formación política. E engade que "hai medo entre a veciñanza", por se non se tomasen en tempo as medidas correspondentes.
