A Consellería de Infraestruturas e Mobilidade recibiu sete ofertas de empresas para executar as obras de mellora do firme na estrada OU-504 ao paso polos concellos de Ribadavia e de San Cristovo de Cea, que suporán un investimento de máis de 1,1 millóns de euros.
A Xunta prevé iniciar as obras a finais do verán co obxectivo de telas rematadas este mesmo ano.
Trátase do reforzo e a rehabilitación do firme da OU-504 entre a intersección coa estrada N-120 en Ribadavia e a intersección coa OU-901 en Cea.
Segundo o treito e o estado actual do firme, realizaranse fresados e reposicións de 5 e 10 centímetros de espesor e disporase unha nova capa de rodaxe mediante o estendido dunha mestura bituminosa en frío tipo microaglomerado.
Para mellorar a seguridade viaria, as obras incluirán a habilitación de cunetas de seguridade de formigón, incluíndo tubo dren e recheo co material de fresado da propia obra.
Tamén se mellorarán os camiños, mediante estendido do material de fresado da propia obra e o selado mediante unha rega asfáltica. Na intervención, ademais, acometerase a limpeza e o reperfilado das marxes.
Responsables da Administración autonómica sinalan que continúan traballando na mellora da rede viaria co fin de proporcionarlles aos cidadáns unhas estradas seguras.
