Érika Paz, actual concelleira no Carballiño, foi elexida por unanimidade primeira presidenta local de Espazo Común, que conta con 70 afiliados. A constitución desta xuntanza local é a primeira das que terán lugar en próximas datas noutros concellos da comarca.
Ademais, foron designados tamén as persoas que conformaran para os próximos catro anos o seu grupo de traballo, a través de delegacións sectoriais.
Paz manifestou o seu agradecemento polo apoio dos compañeiros, destacando a presenza e a forza que aporta o presidente do partido Pachi Vazquez e o feito de que a primeira responsable local de Espazo Común sexa unha muller. Paz garantiu esforzo e compromiso para que "este movemento cidadán de acción política siga a medrar recollendo as inquedanzas da veciñanza e tentando ser útiles para o pobo".