O Instituto de Estudios Carballiñeses (IEC) celebra hoxe o acto de entrega do "IV Premio Ágora do Orcellón" ao arquitecto carballiñés Manuel Gallego Jorreto. O xurado reuniuse no pasado mes de xullo acordando por unanimidade conceder dito premio a Manuel Gallego Jorreto valorando a súa obra arquitectónica en Galicia, a súa profesionalidade como mestre na Escola Superior de Arquitectura da Coruña e o respecto ao medio ambiente nos seus proxectos.
No acto váiselle entregar ao premiado un agasallo, así como o primeiro exemplar do número 36 da revista Ágora do Orcellón, que é un monográfico na súa honra. Neste monográfico colaboran representantes institucionais como o presidente da Xunta de Galicia, Alberto Núñez Feijóo; o presidente do Parlamento de Galicia, Miguel Santalices; o alcalde do Carballiño, Francisco Fumega, ademais de escritores como Manolo Rivas e un gran número de arquitectos e historiadores.
No acto presentarase tamén un novo número da revista do centro de estudios dedicada a Gallego Jorreto
Ao comezo do acto vanse proxectar dous PowerPoint, creados por Óscar Gónfer, arquitecto e socio do IEC, un sobre os premiados con "Ágora do Orcellón" (Xesús Alonso Montero, Mario Augusto Bunge, Antón Pulido e Manuel Gallego Jorreto) e outro sobre os Socios de Honra do Instituto de Estudios Carballiñeses, sendo Manuel Gallego Jorreto o último en recibir esta distinción. Óscar Gónfer será un dos que vai intervir no acto. Este arquitecto firma que "Gallego diseña de lo particular a lo general. Más que un vocabulario, se trata de un método que adapta las referencias regionales a los programas y técnicas modernos, aplicando su sensibilidad hacia los materiales y el detalle", y añade "una síntesis entre racionalismo y empirismo, tecnología y saber tradicional; una conciliación entre modernidad y tradición, entre artificio y naturaleza".
Ao acto asistirá o presidente do Parlamento de Galicia, Miguel Santalices; o director xeral de Cultura, Anxo Lorenzo Suárez; o vicepresidente da Deputación de Ourense, Rosendo Fernández; o alcalde do Carballiño, Francisco Fumega; a decana do Colexio Oficial de Arquitectos de Galicia, Elena Ampudia e unha ampla representación de profesionais da arquitectura de Galicia, así como concelleiros de distintas formacións políticas do Carballiño e outras autoridades locais e provinciais. A laudatio ao homenaxeado será ofrecida por Xesús Alonso Montero, escritor e académico da Real Academia Galega (RAG), da que foi seu presidente entre 2013 e 2017.
Os socios recibirán un exemplar do monográfico de Manuel Gallego Jorreto ao final do acto, no que se contará tamén coa actuación da Real Banda de Gaitas da Deputación.