Coincidindo co período de solicitude de licenzas para a instalación de terrazas na tempada estacional, o Concello do Carballiño pon en marcha unha campaña informativa para lembrar aos titulares dos establecementos hostaleiros a obrigatoriedade de ter licenza para instalar terrazas, así como para non ocupar espazos de dominio público con máis mesas e cadeiras das autorizadas, nin acumular nestes espazos máis elementos dos autorizados ou fóra do período estipulado.
As licenzas de tempada anual durante este ano 2020 son do 1 de xaneiro ao 31 de decembro, e para a tempada estacional, do 4 de abril ao 31 de outubro. As normas a aplicar están recollidas na ordenanza reguladora pola ocupación de dominio público local con mesas, cadeiras, tarimas e outros elementos análogos.
Os locais hostaleiros do Carballiño xa poden solicitar as licenzas para a instalación de mesas, cadeiras e tarimas en espazos de dominio público local durante a tempada estacional 2020 desde o pasado 10 de febreiro. Este prazo, que é tanto para renovación como para primeira autorización, rematará o día 29 do mesmo mes, sendo o período de ocupación desde o 4 de abril ao 31 de outubro de 2020. No Carballiño hai cen locais, dos cales o 60% solicita a instalación de terrazas durante a primavera e o verán, e o resto para todo o ano.
