CARBALLIÑO

Novos operarios para eliminar barreiras e limpar a contorna de Carballiño

Son 16 parados contratados polo Concello que xa empezaron coa limpeza do leito do río

Traballos de limpeza do leito do río Arenteiro, no tramo do Parque municipal (C.R.).
Traballos de limpeza do leito do río Arenteiro, no tramo do Parque municipal (C.R.).
Novos operarios para eliminar barreiras e limpar a contorna de Carballiño

O Concello do Carballiño reforza as brigadas municipais de Medio Ambiente e de Obras con 16 operarios, que terán como principais cometidos a limpeza e acondicionamento dos camiños e espazos naturais do termo municipal, así como a mellora da mobilidade peonil urbana, eliminando calquera tipo de barreiras arquitectónicas nas beirarrúas que dificulten o paso das persoas.

Trátase de oito albaneis e oito peóns forestais, que forman parte dun convenio asinado entre o Concello e o Servicio Público de Empleo Estatal dentro dun programa de colaboración para a reinserción de persoas desempregadas. O período de duración dos contratos oscila entre os catro e os seis meses, segundo os casos, o que permitirá manter á maioría durante o próximo verán.

Como primeiro cometido, unha parte desta brigada de limpeza forestal, en colaboración cos medios humanos e técnicos de Protección Civil, proceden á retirada da ramaxe do río Arenteiro, sobre todo no tramo entre o Parque municipal e o Gran Balneario, onde se vai a disputar o próximo sábado un torneo de piragüismo que traerá ao Carballilño a 400 palistas de toda Galicia.

Esta intervención servirá tamén como complemento aos traballos que desenvolven as brigadas da Confederación Hidrográfica do Miño - Sil, que consisten en retirar as árbores secas, moitas delas do leito do río.