As actividades desenvólvense de luns a venres e en horario de 10,00 a 13,00 horas, no Centro Social de Piñor.
O Concello de Piñor desenvolve o programa Piñor Concilia, considerando que "a conciliación da vida familiar e laboral é algo fundamental para o benestar das familias e dos menores a cargo, e ten que supoñer un compromiso por parte das diferentes administracións", sinalan os responsables municipais.
Desta maneira, o proxecto engloba unha serie de iniciativas que permiten a atención dos menores nos diferentes períodos escolares, permitindo así facilitar dunha forma efectiva a conciliación da vida familiar e laboral dos seus proxenitores.
Dentro deste programa e durante o verán, ofrécense actividades infantís diarias denominadas "Diververán", que comezaron este pasado día 1 de xullo e se prolongarán ata o 30 de agosto.
As actividades desenvólvense de luns a venres e en horario de 10,00 a 13,00 horas, no Centro Social de Piñor.
O programa está destinado a nenos de entre catro e trece anos, que contarán con actividades moi diversas: deportes, gymkhanas, obradoiros e manualidades, globoflexia e incluso está contemplada unha sesión de deportes de multiaventura, entre outras ofertas de ocio e deportivas, que están dirigidas por monitores especializados. O concello facilita así ás familias a atención aos máis pequenos en tempada de vacacións, para que poidan seguir traballando e non se enfrenten ao problema de buscar un lugar onde deixar aos seus fillos.
