A Concellería de Servizos Sociais do Carballiño valorou moi positivamente o programa de actividades que desenvolve para a prevención de situacións de risco dirixido aos nenos. Este programa, que finaliza hoxe, estivo destinado a nenos de entre 9 e 15 anos vinculados ao Servizo de Educación e Apoio Familiar. As actividades contaron coa colaboración de Dar Trela Teatro, Tesgalicia e o Centro Sociocomunitario do Carballiño.
O programa levouse a cabo durante o mes de xullo no Centro Sociocomunitario e o seu obxectivo consistiu en reducir factores de risco e ofrecer igualdade de oportunidades no acceso ao benestar e á participación social.
As actividades desenvolvéronse en catro módulos. No primeiro traballáronse habilidades sociais, co obxectivo de que os menores adquiran estratexias que lles permitan relacionarse cos outros de modo asertivo e igualitario.
No segundo módulo levouse a cabo formación en primeiros auxilios, actividade para a que se contou coa colaboración de Tesgalicia (Asociación de Técnicos de Emerxencias Sanitarias e Xestores de Emerxencias de Galicia ), e prevención no consumo de drogas.
A igualdade e a prevención dos abusos sexuais foi a temática do terceiro módulo, no que colaborou a agrupación Dar Trela Teatro. Por último, os nenos participantes traballaron a regulación emocional mediante dinámicas lúdicas e reflexivas.
