O temporal atrasa ao domingo a representación do belén vivente de Dacón

O forte temporal rexistrado nesta pasada madrugada en diferentes puntos da provincia de Ourense e no resto de Galicia provocou o adiamento da realización do belén vivente de Dacón, que fica adiado até o vindeiro domingo.

A portavoz da asociación de veciños, Ana Belén Conde, que organiza esta representación que reproduce a historia sagrada desde a chegada de Xosé e María na procura de pousada en Belén até a chegada dos Reis Magos, decidiu adiar este acto e non decorrerá, como todos os anos, no día do Nadal.

As intensas chuvias e o vento anegaron e causaron diferentes estragos na zona da Carballeira onde se realiza todos os anos o belén, motivo polo que a organización decidiu suspender a actividade a fin de recompor a zona.

No día de onte, os organizadores estudaban a posibilidade de trasladar a actividade ao interior da igrexa, mais finalmente preferiron adiala, co propósito de poder realizar a recreación nun escenario natural.

Entre outros problemas, o temporal provocou caída de árbores e inundacións na provincia ourensá, aínda que fontes da Consellería indicaron que non se rexistraron danos significativos.

Entre as principais incidencias, fontes da Renfe indicaron á Efe que houbo 'atrasos' e algún 'transbordo puntual' dos viaxeiros durante a mañá principalmente en dous puntos, nos trens que circularon entre A Coruña e Betanzos, así como na liña Guillarei-Ourense.

Te puede interesar