Os visitantes poderán facer papel na Lavandeira

O Concello do Carballiño solicitará axuda á Consellería de Cultura para concluir o proxecto de musealización da fabrica de papel da Lavandeira entre os anos 2021 e 2022, co que se pretende dar a coñecer unha faceta importante desde o punto de vista histórico do proceso de industrialización decimonónica da Galicia interior, e concretamente da comarca do Carballiño, posto que se trata dunha proposta de recuperación da arqueoloxía industrial que converteu a este concello en pioneiro nos procesos de industrialización da Galicia do século XIX, segundo apunta o alcalde, Francisco Fumega. Esta proposta museolóxica permite coñecer a fondo un momento caracterizado pola aparición dunha incipiente industria capitalista, así como os protagonistas humanos que forxaron esta realidade. "A fábrica de papel da Lavandeira é un raro exemplo do proceso industrial galego asentado na base da utilización da enerxía eléctrica derivada do aproveitamento do río Arenteiro", matiza o rexidor. O alcalde, Francisco Fumega, trasladou o proxecto do Museo do Papel á xunta coa idea de rematalo entre os anos 2021 e o 2022 Na actualidade, a fábrica encóntrase en estado de recuperación, estando xa executada a primeira fase consistente na recuperación do secadoiro, proxecto arquitectónico obra do premio nacional de Arquitectura Manuel Galego Jorreto. Este espazo acollerá o proceso seco da fabricación do papel e diversas estancias expositivas, estando rematado na súa totalidade a restauración arquitectónica e a espera de realizar o proxecto museístico. A recuperación construtiva dos diferentes espazos funcionais da fábrica e o proceso de musealización correspondente levarase a cabo en tres fases. A primeira, proxectada a súa execución no 2021, consiste na rehabilitación e nova adaptación funcional do edificio de tres plantas dedicado fundamentalmente ao secado das follas de papel. Así, no semisótano recuperase o taller de elaboración do papel; na planta cero os visitantes poderán elaborar unha folla de papel de maneira manual a partir do trapo; outro departamento recollerá a sala de bruñido do papel e unha terceira estancia ás separadoras do que esté defectuoso; tamén haberá un sequeiro cos tendais e mesas de colocación e o resto da sala haberá documentos históricos (filigranas, prensa e follas de papel orixinais) e documentación dos persoeiros que posibilitaron a existencia desta fábrica no río Arenteiro. Ademais, a planta superior estará destinada a un auditorio para 40 persoas dotado de medios audiovisuais e informáticos. A segunda fase, tamén no 2021, consiste no remate dunha construción que xa está en execución na que se instalará unha pequena sala de recepción, unha tenda do museo, os aseos e un almacén. A terceira fase está prevista cara o 2022 e consiste na rehabilitación do podredoiro dos trapos e da casa da cola onde se instalará o departamento de encolado e lacado do papel reproducindo o proceso de fabricación de colas a partir de graxas animais. No exterior, aproveitando os arcos graníticos orixinais reconstruirase o lavadoiro e a sala de trituración coas rodas, mazos e pilóns de desfiado e afinado do trapo antes de ser transportado para o pilón de almacenamento da pasta. Neste departamento será reconstruido o pilón de escurrido da auga e na última roda a pila de desleir e as tinas de cobre para transportar a pasta á tina do obrador. Con esta última fase, rematarase este proxecto de creación do Museo do Papel, cuxo edificio principal xa fora recuperado por Manuel Gallego Jorreto.