O grupo municipal do BNG de Cenlle manifesta a súa total oposición ao soldo do alcalde, José Manuel Rodríguez Lamas, aprobado nun recente pleno. "Nin a apertura do Centro de Saúde, nin a iluminación de Nadal, nin mellorar o deficitario servizo de auga, nin establecer unha parada de taxi ou un caixeiro. O grupo de goberno decidiu que a prioridade no último pleno era poñerlle un soldo ao alcalde que lle custará máis de 20.000 euros anuais á veciñanza", sinalan os nacionalistas.
Desde a oposición, engade o BNG que "xamais un alcalde cobrara no noso concello, e parécenos un despropósito inmoral e carente de toda ética que se decida facer neste momento". Aseguran que o grupo de goberno está composto por sete membros, "que din ser un equipo e entre os que se podería repartir o traballo".
Nese sentido, tamén critica que ese traballo municipal "foi delegado en gran parte a outras institucións a través das múltiples transferencias de competencias do concello levadas a cabo ao longo destes anos".
O alcalde, José Manuel Rodríguez Lamas, declarou que será unha dedicación parcial ao Concello por un importe total anual de 15.400 euros. "A cantidade equivale ao que deixarei de percibir na empresa na que traballo", matiza.
Ademais, o rexedor municipal tamén puntualiza que con este soldo xa non cobrará pola asistencia a plenos nin a comisións de goberno.
