O edificio comarcal en Ribadavia acolleu unha charla técnica informativa sobre as axudas que a Consellaría de Medio Ambiente, Territorio e Vivenda achega este ano para previr e paliar os danos provocados nos cultivos polo xabaril. As ordes foron publicadas no DOG do pasado 7 de febreiro.
A charla foi desenvolvida por catro técnicos da Xefatura territorial de Medio Ambiente, Territorio e Vivenda en Ourense, dirixidos polo xefe de servizo de Patrimonio Natural, Juan José Gómez e foi organizada polo Consello Regulador da Denominación de Orixe Ribeiro coa colaboración da consellería. O presidente do Consello Regulador, Juan Casares, transmitíralle hai meses á Directora xeral de Patrimonio Natural, Belén do Campo, a súa preocupación polos danos do xabaríl no Ribeiro "e pedinlle un aumento das partidas orzamentarias así como unha especial sensibilidade co noso territorio", apuntou Casares.
Segundo os técnicos, a orde comprende as indemnizacións para os danos que se comuniquen dende o 11 de outubro de 2019 ata o 10 de outubro de 2020. O prazo de presentación da solicitude de axuda será dun mes contado dende o día seguinte ao da comunicación do dano ao teléfono 012.
Os danos que este animal está a provocar nos viñedos do territorio demarcado da Denominación de Orixe Ribeiro aumentan todos os anos chegando a converterse nunha nova preocupación para os viticultores, polo que o Consello Regulador considerou necesaria esta charla informativa.