O próximo 27 de marzo celébrase o Día Mundial do Teatro e o Concello de Ribadavia aproveita a ocasión para poñer en valor novamente o teatro como patrimonio cultural.
A concelleira de Cultura e tenente de alcaldía de Ribadavia, Paula Rodríguez, presentou o cartel coas actividades a desenvolver, que contempla teatro infantil e unha sesión de lectura dramatizada para o próximo fin de semana.
Así, o día 25 de marzo, haberá teatro de rúa na Alameda con Kote Malabar e o 26 terá lugar una sesión de lectura, ás 12,00 horas, no local social da Madalena.
As lecturas serán escollidas entre os gañadores do Premio Abrente de Textos Teatrais da Mostra Internacional de Teatro Ribadavia.
“Ribadavia é capital galega do teatro todos os anos grazas a celebración da MIT no mes de xullo, pero o teatro é cultura todo o ano e forma parte da nosa sociedade”, sinala Paula Rodríguez, lembrando a aula municipal que se puxo en marcha na actual etapa de goberno impulsada pola Concellería de Cultura e coa actriz local Rosa Puga.
