A zona histórica de Ribadavia gaña espazo público tras engadir un solar

O Concello de Ribadavia creará unha nova praza pública recuperando un antigo solar usado como aparcamento. Desta maneira gañará un novo espazo público situado estratexicamente na zona monumental, xa que está preto dunha das entradas ao auditorio do Castelo e á muralla medieval da Porta Nova. "O Goberno de Ribadavia proponse como reto a mellora e dinamización do casco histórico, así como o seu maior coidado e limpeza", segundo apunta o seu portavoz, Brais Fidalgo. Para conseguir a recuperación deste espazo, o Concello iniciou os contactos na primeira semana de goberno, e despois de un mes logrou adquirir este solar da rúa Porta Nova de arriba. Alí, a pesar de non estar permitido aparcar no casco histórico e de estar ao lado dunha das principais entradas á zona monumental de Ribadavia como é a Porta Nova, este solar acabou converténdose nun aparcamento. "Desde o Concello queremos agradecer a boa disposición e as facilidades neste proceso da familia herdeira", apunta Fidalgo. O propietario orixinario foi Manuel González González, "O Serronco", un veciño da vila que foi represaliado por republicano e morreu no penal da Illa de San Simón nos anos da represión falanxista. Xa na década dos 80 do século pasado, os seus herdeiros non puideron evitar "que a casa fora derrubada inxustamente polo Concello, sendo espoliados os seus restos arquitectónicos, entre eles varios escudos históricos", sinala o portavoz do grupo de gobierno. Agora, con esta adquisición o Concello está traballando na conversión deste solar nunha praza pública, humanizada con mobiliario urbano e plantas, coa mellora da iluminación, e na que ademais haberá sitio para a memoria histórica da casa e do seu propietario, cunha fotografía do antigo edificio derrubado e unha mención a Manuel González "O Serronco". Todo este proceso para incorporar o solar ao patrimonio municipal realizouse da man dos servizos técnicos e xurídicos do Concello, sendo supervisado en todo momento polo secretario municipal e axustándose aos criterios técnicos da arquitecta municipal. A adquisición fíxose por acordo entre os responsables municipais e os herdeiros, a través da figura de "expropiación de mutuo acordo". As autoridades locais conclúen declarando que "faremos todo o posible para que o casco histórico dispoña deste novo espazo mellorado para uso e desfrute de veciños e dos milleiros de visitantes que Ribadavia ten cada ano".