Alcalde de San Xoán de Río: "Estiven recibindo ameazas nas que me chamaban de todo"

Noutro xiro da política local ourensana, o alcalde de San Xoán de Río, Xosé Miguel Pérez Blecua, independente, pasou a militar no Partido Popular. Chegou ó poder da man da agrupación de Electores de Río, que conseguiu maioría absoluta nas pasadas municipais. Militante do BNG hai tempo, traballaba nunha empresa de telecomunicacións en Santiago, aínda que se mudou á vila tralo triunfo electoral. Agora convértese na nova fichaxe do PP de Ourense nun movemento que levantou suspicacias fóra do concello. Cal é o motivo que está trala súa entrada no Partido Popular? Os membros do Partido Popular de aquí que levaban trinta anos tiveron, despois das eleccións galegas, unha reunión na que dende o PP de Ourense se lles trasmitiron as disculpas por non ter contado con eles nas municipais. Debéronlle falar moi ben de min ó presidente Baltar, que me chamou e preguntoume se me interesaba entrar no PP de Ourense. Hai un mes tiven un accidente de coche, polo que lle pedín esperar para tomar a decisión e poder dar a cara. E como o tomaron na agrupación de electores? Todo o mundo ben. En San Xoán de Río vai seguir gobernando unha lista independente. Cal é a diferenza? Que agora o alcalde, en vez de non estar adscrito a nada, é militante do Partido Popular dende o día de antonte. Estiveron todos de acordo. A agrupación de electores de San Xoán de Río vai seguir funcionando como ata agora. No pasado militou no Bloque Nacionalista Galego. Houbo a quen lle sentou mal? Estiven recibindo múltiples ameazas chamándome de todo, cousas que me parecen bastante graves estando nunha democracia. Esta xente sabemos que fai moito ruído. Agora queren quentar o tema de Viana do Bolo e vanme usar a min. Neste mundo é moito máis fácil destruír que construír, é moito máis facil botar bile pola boca e insultar, ameazar... Supoño que quedarán aí as cousas. A súa conversión en 15 anos dende o BNG ó PP pode ser difícil de entender para algúns. En redes sociais levantouse polémica... O tema do Bloque foi cando tiña vinte anos, teño trinta e catro. Eu marchei tralo de Amio. Nunca estiven afiliado, apuntáronme a Galiza Nova cando estaba de concelleiro. E esta xente, que case toda é da costa, nin sabe onde queda San Xoán de Río... Igual levan dez anos sen falarme, sen saber nada de min, pasa o de Viana do Bolo e vai opinar todo o mundo. A esta xente gústalle a radicalidade e non lle gusta a democracia. Eu creo que teño o meu dereito a militar en calquera dos sitios. En concellos pequenos como o de San Xoán de Río é bastante difícil diferenciar políticas de esquerdas e de dereitas, son cousas transversais. Noutra orde de cousas, San Xoan de Río ten futuro? Por onde pasa ese futuro? É xusto o motivo que máis me animou a presentarme. O señor Luis Castro dixo que isto non tiña futuro. Eu non me resigno a iso, é o pobo dos meus avós, é o pobo no que quero vivir e no que todo o mundo que queira poida vivir. O futuro aquí pasa pola dixitalización. Respetando a tradición e a cultura que hai aquí, hai que facer as cousas de xeito dixital para reducir costes e mellorar os servizos da poboación. O único que queremos é que todos os que queiran retornar poidan retornar.