A maior parte vaise para obras na provincia de Ourense
Adif-Alta Velocidade prevé investir en 2018 en Galicia un total de 461,5 millóns de euros, o que supón un 4% menos que os 481,34 millóns que figuraban inicialmente no proxecto de Orzamentos Xerais do Estado (PGE) en 2017.
Se a comparativa faise co que incluían os PGE de 2016 (802,42 millóns), o descenso é próximo á metade, dun 42,5% menos, cunha baixada duns 350 millóns.
Segundo contempla o proxecto de orzamentos presentado este martes polo Ministerio de Facenda, a provincia de Ourense recibe a maior partida para alta velocidade, con 410,2 millóns de euros (eran 462,8 en 2017).
Aquí, case todo o absorben as obras entre Olmedo e a cidade das Burgas, con 406 millóns. Pola súa banda, a variante de Ourense conta con 3 millóns para 2018, que serán 35 millóns en 2019, 228 millóns en 2020 e 154,5 millóns en 2021, segundo as previsións do documento presentado este martes.
Na provincia da Coruña, resérvanse 43,8 millóns para actuacións no Eixo Atlántico (eran 8 millóns nos PGE de 2017). Para a provincia de Pontevedra hai 7,5 millóns -son 7 millóns para o Eixo Atlántico-.
Na conexión de Ourense con Vigo por Cerdedo contémplanse 550.000 euros para actuacións na provincia ourensá e 450.000 euros na provincia de Pontevedra. Para esta obra prevense uns 165 millóns entre ambas as provincias até 2021.
No tocante á provincia de Lugo, non se destina ningunha partida a Alta Velocidade, tan só hai 7 millóns de euros de Adif para melloras en liñas, estacións e pasos a nivel.
Con todo, nos orzamentos coñecidos este martes figura a estimación de investimento realizado en alta velocidade de 2017, con 302,5 millóns en Galicia, que queda lonxe do orzado para ese ano. En detalle, houbo un investimento de 238,2 millóns en Ourense; 45,9 millóns en Pontevedra e 18,4 millóns en Lugo.
Actuacións
Segundo a memoria dos orzamentos, na AVE de Madrid a Galicia, a Secretaría de Estado prevé en 2018 terminar a fase de planificación da nova liña Ourense-Vigo por Cerdedo, até completar a súa tramitación ambiental.
Para dar continuidade ao tramo Olmedo-Zamora xa en servizo, "potenciaranse as actuacións entre Zamora e Ourense con obxecto da súa finalización nos prazos previstos". Ademais, iniciaranse actuacións na variante de Ourense (Nova Plataforma Taboadela-Ourense en ancho UIC) e na estación de Ourense.
No Eixo Atlántico Adif-Alta Velocidade prevese en 2018 a dotación necesaria para finalizar a instalación de ERTMS en todo o eixo, así como para levar a cabo actuacións nas estacións de Santiago e A Coruña.
Pola súa banda, iniciaranse durante 2018 os estudos do baipás de Betanzos co obxectivo de reducir os tempos de viaxe entre A Coruña e Ferrol.
No tocante á liña de alta velocidade Ourense-Lugo está previsto "continuar cos estudos" das actuacións para a conexión coa liña Madrid-Galicia.
