O Concello de Ourense realizará unha avaliación dos seus traballadores co obxectivo de "coñecer os riscos psicosociais aos que se poidan enfrontar", destacan.
O estudo, presentado onte luns no salón de plenos pola empresa Cualtis, concesionaria do servizo de prevención, dentro do marco do comité de seguridade e saúde, pretende comezar polas áreas de Policía Local e Bombeiros, pero estenderase a todo o persoal municipal.
Á reunión acudiron o departamento de Recursos Humanos, co concelleiro Armando Ojea á fronte, e representantes das centrais sindicais.
O primeiro paso será a creación dun grupo de traballo para asesorar a análise. Estaría formado por tres técnicos municipais, tres delegados sindicais e a empresa concesionaria, Cualtis. O comité reunirase de novo o vindeiro luns co obxectivo de conformar este grupo de traballo.
