MEDIO RURAL

O Banco de Terras cederá 107 parcelas a trece concellos

banco_tierras_result
photo_camera Reunión dos alcaldes co director xeral da Axencia Galega de Desenvolvemento rural.

Os predios non teñen utilidade agraria e pasan a ser propiedade municipal para uso dos veciños

Trece concellos da provincia de Ourense poderán acceder á propiedade de 107 parcelas pertencentes ao Banco de Terras. O director xeral da Axencia Galega de Desenvolvemento Rural, Miguel Pérez Dubois,  mantivo onte un encontro cos responsables dos concellos que se beneficiarán desta transferencia de terras e explicoulles os predios que son susceptibles de recibir para o seu uso veciñal e o proceso a seguir.

Na reunión, que se celebrou na delegación provincial de Medio Rural, participaron representantes dos concellos de Xunqueira de Ambía, Xunqueira de Espadañedo, Castrelo do Val, Cualedro, Monterrei, Oímbra, Verín, Bande, Muíños, O Carballiño, Esgos, San Cibrao das Viñas e A Veiga. Entre todos concellos hai un total de 107 parcelas que son susceptibles de pasar a ser de titularidade municipal.

Estes terreos pasarán a ser propiedade dos Concellos grazas á Lei de Mellora da Estrutura Territorial Agraria de Galicia (Metaga), que permite que os predios sen utilidade agraria pasen a ser directamente do concello dun xeito máis áxil e con menos carga burocrática que a tradicional cesión que se viña realizando ata o de agora.

Non é a primeira vez que se formaliza un traspaso deste tipo. En 2017 Medio Rural formalizou o cambio de titularidade de 1.234 parcelas a 37 concellos e o obxectivo é chegar á revisión de 2.500 terreos que están no catálogo de terras, pero que non poden ser arrendados a agricultores e gandeiros.

Te puede interesar