O subdelegado do Goberno en Ourense, Emilio González, desprazouse onte ao centro de almacenamento da Cruz Vermella, no Polígono de San Cibrao, para supervisar o desenvolvemento da segunda fase do programa 2021 de Axuda Alimentaria ás persoas máis desfavorecidas. Alí, fixo balance do programa posto en marcha polo Ministerio de Agricultura, Pesca e Alimentación a través do Fondo Español de Garantía Agraria durante 2021, que supuxo o reparto de 485,5 toneladas de alimentos na provincia a través da Cruz Vermella, do Banco de Alimentos e das organizacións colaboradoras.
Na visita estivo acompañado polo presidente provincial de Cruz Vermella Ourense, Felipe Ferreiro; polo técnico responsable do programa, Diego Conde; e pola responsable da Unidade de Administración Territorial da Subdelegación do Goberno, Mercedes Lage.
O programa desenvólvese en dúas fases, unha que se levou a cabo nos meses de maio e xuño e outra que se desenvolve en outubro. González destacou “a importante achega do Goberno, que destinou 401.636 euros para a compra destas cestas de produtos alimenticios básicos en Ourense”.
Nesta segunda fase farase chegar axuda alimentaria a 9.341 beneficiarios ourensáns aos que se distribuirán un total de 301.028 quilos de alimentos cun valor de 279.388 euros. Na primeira fase entregáronse 184.488 quilos de alimentos cun valor de 122.248 euros a 10.021 beneficiarios. Durante a segunda fase, Cruz Vermella repartirá 150.514 quilos de alimentos a 76 entidades asociadas de reparto para chegar a 4.498 beneficiarios. O Banco de Alimentos distribuirá o mesmo número de quilos de alimentos entre 44 entidades asociadas de reparto para chegar a 4.843 beneficiarios.
