Tras o nome de Canela Cafuné agochanse os nomes de Marta e Éric, dous mozos cuxa paixón pola música os levou a formar un dúo que está a gañar por méritos propios o seu espazo no mundo musical. Dende o soul ou o jazz, pasando polo pop e o rock, as influencias vense en cada tema que interpretan e que poñen de manifesto que calidade interpretativa non lles falta.
A pesar da corta vida de Canela Cafuné, xa compartiron tempo e música con artistas como os escritores María Reimóndez e Suso Sudón ou os cantautores Álvaro Ruiz e Pedro Pastor. Ademais, teñen participado en eventos organizados por Arelas (Asociación de Familias de Menores Trans), e tamén de que concellos coma O Carballiño e Sarria os incluíran na programación das súas actividades culturais. E, por suposto, sen deixar de lado todos eses locais e diversos espazos culturais que confian neles e lles brindan a oportunidade de poñer en marcha o seu proxecto.
Como foron os inicios de Canela Cafuné? Como vos lanzastes a súa creación?
Coñecímonos por casualidade e da mesma maneira fixemos a nosa primeira actuación conxunta, a priori, por diversión. Ao ver a afinidade musical e a resposta do público, decidimos emprender o proxecto Canela Cafuné desde un punto de vista profesional. E aquí estamos!
De onde veñen as vosas influencias?
Marta: Do soul, do jazz e evidentemente do canto clásico, que é o campo no que máis me formei.
Éric: Do rock, pop-indie e do folk básicamente, desde Carmen Boza, pasando polos Panchos e ata os Suaves.
Que se atopa o público nas vosas actuacións? Que tipo de música vai escoitar?
Éric: Un espectáculo que mestura versións de diferentes estilos a dúas voces con chistes xeniais.
Marta: Obviemos o dos chistes (risas). O noso espectáculo básase, sobre todo, na participación activa do público dentro dunha combinación de diferentes estilos musicais no que o máis importante é a harmonía de voces.
Que é o que máis lles gusta da música?
Que representa a alternativa ás palabras para expresar e transmitir o que sentes, sen filtros. Unha forma de mostrar sentimentos e situacións.
É difícil facerse oco no panorama musical?
Si, por suposto. Hai varios factores negativos como pode ser a falta de recoñecemento da música coma unha actividade laboral, o que implica falta de medios, subvencións e convenios que regulen unhas condicións dignas. En cambio, destacamos positivamente a calidade do talento local e autonómico, que fai que nos teñamos que esforzar en aprender e mellorar.
Cales son os vosos próximos proxectos?
Gravar unha maqueta, incorporarnos de forma regular ó mundo dos eventos familiares (polo que o 14 e 15 de xaneiro formaremos parte do salón nupcial ExpoBEC) e, por supostísimo, seguir realizando concertos por toda a xeografía galega.