Trátase de garantir o acceso aos servizos financieiros nos municipios galegos máis pequenos
Os municipios de Chandrexa de Queixa e A Arnoia, na provincia de Ourense, forman parte do grupo de localidades -xunto a O Páramo (Lugo), Toques (A Coruña) e Lousame (A Coruña)- que veñen de estrear en Galicia novos caixeiros automáticos baixo o acordo asinado entre a entidade Abanca e a Xunta de Galicia para garantir aos habitantes do eido rural o acceso aos servizos financieiros e a súa inclusión neste senso.
Así, segundo explicaron dende a corporación bancaria, as cinco infraestruturas -que xa están en funcionamento- facilitarán que os veciños e veciñas destas localidades poidan dispoñer de efectivo e realizar as xestións máis habituais sen ter que desprazarse a outro termo municipal, tal e como viña acontecendo ata hai pouco tempo.
Na mañá deste martes, 15 de marzo, o conselleiro de Facenda e Administración Pública, Miguel Corgos, e o director xeral de Política Financeira, Tesouro e Fondos Europeos, David Cabañó, achegáronse ata Chandrexa de Queixa xunto a outros responsables de Abanca como o director de Negocio Institucional Galicia, Asturias e León, Liño Comesaña; a directora de zona Ourense-Este, María José López, e o coordinador de Negocio Institucional en Ourense, Mateo Alonso. Alí comprobaron o bo funcionamento da nova instalación que, no caso concreto de Chandrexa de Queixa, dará servizo a un total de 500 persoas.
Grazas a este acordo entre a administración autonómica e o banco galego, un total de 36 novos municipios de toda Galicia contarán con este dispositivo nos próximos meses, a meirande parte estará en Ourense.
22 POBOS BENEFICIADOS
Por medio dunha serie de traballos, diferentes pobos do rural ourensán -un total de 22- contarán con caixeiro automático antes de que remate o vindeiro mes de maio: serán, concretamente, A Arnoia, Baltar, Os Blancos, Carballeda de Avia, Cenlle, Chandrexa de Queixa, Xunqueira de Ambía, Xunqueira de Espadanedo, Larouco, Lobeira, Melón, Oímbra, Petín, Piñor, Pontedeva, Porqueira, Rairiz de Veiga, Taboadela, A Teixeira, A Peroxa, Vilar de Santos e San Xoán de Río. Os restantes repartiranse entre a provincia de A Coruña, con 11 instalacións, e Lugo, con tres.
Por último, dende a corporación financieira traballan na ampliación da rede de caixeiros automáticos na comunidade e defenden que “a capilaridade da rede comercial de Abanca en Galicia sitúa a comunidade galega como a segunda comunidade autónoma con maior accesibilidade a servizos financeiros. Só un 12 por cento dos municipios carecen de oficina fronte ao 51 por cento que non dispoñen dela no resto de España”, aseguran dende Abanca.
