Cruz Vermella encara as datas de Nadal cunha nova campaña de recollida de xoguetes, impulsada pola área de Xuventude da organización. "Todos os anos traballamos no proxecto 'Xoguete educativo' destinado a que os nenos teñan acceso a unha educación mediante o xogo", explica Adriana Diéguez, coordinadora provincial da área de Xuventude da organización.
Dentro de "Xoguete educativo" encóntrase a recollida na que xa se encontran inmersos ata o 17 de decembro. "Todo o que se consiga daráselle aos nenos que formen parte de Xuventude, e a todos aqueles que veñan derivados de Servizos Sociais ou outros departamentos de Cruz Vermella", sinala Diéguez. O seu obxectivo é que todos os menores teñan un xoguete para poder xogar, especialmente nas datas que se aproximan. "Temos empresas que colaboran con nós, pero tamén estamos abertos a todas as aportacións que queira facer calquera persoa", afirma a coordinadora.
Nas instalacións de Cruz Vermella xa están a recoller todos aqueles xoguetes que as persoas desexen doar para que todos os nenos teñan un regalo de Nadal. "Aceptamos xoguetes totalmente novos, para asegurar a súa calidade e a hixiene", apunta Diéguez. Ademáis de cumprir con esas condicións, engaden outras como que sexan "educativos, non bélicos, non sexistas e cooperativos".
Nesta campaña contan co apoio de Obra Social La Caixa que "aporta unha cantidade económica para que podamos comprar xoguetes". O pasado ano fixeron "entre 350 e 400 entregas" entre todas as asambleas de Cruz Vermella repartidas en nove comarcas. "Os xoguetes dámosllos a nenos de 0 a 18 anos de idade, abarcamos infancia e xuventude", comenta a coordinadora. Dende Cruz Vermella pretenden que todos teñan acceso a un xoguete novo porque sofren "a dificultade económica e tamén social, en moitos casos".
Unha vez finalizado o tempo de campaña o 17 de decembro, Cruz Vermella comezará a traballar nas entregas. "Todas as familias pasan por un proceso de valoración, esa é a maneira que temos de detectar a necesidade", aclara Diéguez. Os xoguetes danse aos familiares ou tutores dos nenos. "Queremos axudar que os que teñan ilusión, a sigan mantendo nestas datas", remata a coordinadora.